SHILLONG: Meghalaya aro Assam a·dokni gisepo meligrikna man·jaenggipa biaprangoni da·o bangki dongkuenggipa damdok jolrangko namatna gita a·dok damgnini agangrikanio, ia sima jolrango songdongenggipa manderangni nangnikanirangkoba sorkari ra·gen ine Budbar salo, a·dokni Home Minister Lahkmen Rymbui, ku·rachakaniko on·angaha.
Iani bidingo kobor ra·timgipa manderang baksa agangrikengon, indita bilsirangna a·dok damgnini simarango ong·enggipa golmalrangko namatna gita Meghalaya aro Assam a·dok damgnini sorkarirangan gisiko nange kamko ka·enga ine Rymbui parakataha.
“A·dok damgnini simarango ong·enggipa golmalrangko chinga sima jolrango songdongenggipa manderangni nangnikanirangko ra·chengesa namatna jotton ka·gen. Ia kamko ka·anio dingtang dingtang ja·kurangko de·na nangani gimin ian altua kam ong·jawa ine chinga ma·sia indiba manderangni nangnikanirangko ra·chengesa pilak kamrangkon ka·na chinga ku·rachakenga,” ine Home Minister parakataha.
Kamrangko a·bachengatna gita a·dok damgnini sorkarirangan nangnikenga ine janapatengon, Jaintia Hills-ni regional committee-ba re·anggipa October 6 tariko iani gimin tom·e chanchirimaha ine Rymbui parakataha.
A·dok damgnini simarango bangki dongkuenggipa biaprangko namatna kamrangko ka·chakatna gita adita salrangna skangsan a·dok sorkari, dolgittam regional committee-rangko songe donangahachim ine nikna man·a.
Ia dolgittam regional committee-rang, West Khasi Hills a·jani Langpih, Ri Bhoi a·jani Borduar, Nongwah-Mawtamur aro Block-II baksana West Jaintia Hills a·jani Psiar-Khanduli jolrangni bidingo tale am·sandianirangko dakna siengachim.
