SHILLONG: Chief Minister’s Safe Motherhood Scheme (CM-SMS)-ni ning·o a·dok sorkarini a·bachengate on·gipa Transit Home-rang, an·o donggipa me·chikrang, aro mongsongbate gari gora soke man·gijagipa songni me·chikrangna bang·a namgni ong·enga ine nikna man·enga.
Ia CMSMS-ara Meghalaya a·doko an·o donggipa me·chkrangni aro bi·sa bakgitchakrangni sianiko komiatna a·dok sorkarini a·bachengate on·gipa scheme ba program ong·achim ine nikna man·a.
Kobor on·timgiparangni u·iatani gitade, ia Transit Home-ni namgniko man·gipa me·chikrangoni West Garo Hills a·jao Imbegre minggipa songoni saksa bilsi 21 ong·gipa Tira T Sangma-ba ong·paaha.
Ia me·chikara bi·sa sakgnini ma·gipa ong·e da·o gittamgipa changna an·o dongenggipa me·chik ong·a indiba uni skanggipa bi·sa sakgnian noktango ba·gipa bi·sarangsa ong·achim.
Adita salrangna skang, Auxiliary Nurse Midwife (ANM)-ni ong·atanggipa Village Health Nutrition Day (VHND) program-o Tira-ba bakko ra·eon, uko an·chi komia ine nikenba, mikkangchi uni bi·sarangko noko ba·jachina aro health centre-rangonasa re·ange ba·china gita sanna banani kamrangko ka·enggipa manderang ku·pattiataha. Uni gittamgipa changna an·o dongengmiting somoio ua an·pakna sal 10 skangan, an·tangni segipa baksa Asanang Self Help Group-chi chalaienggipa Asanang transit home-ona re·angaha aro da·o ua an·tangni gittamgipa bi·sako an·pakna ia transit home-o senge dongengaha ine kobor on·timgiparang parakataha.
