SHILLONG: East Khasi Hills a·jani Sohra Government College-o Science aro Commerce stream-rangko kulie on·china aro Khatarshnong jolo higher secondary skul damsako kulichina gita didie Mongolbar salo, KSU South Khasi Hills District Unit (SKHDU)-ni dilgiparang, a·dokni Education Minister Lahkmen Rymbui-ko grongeaha.
Education Minister-ko grongeani ja·man kobor ra·timgiparangna talataniko on·angengon, da·o dipet Sohra Government College-o Arts stream-san dongkuengani gimin a·dok sorkari, chatro chatrirangni namgnina Commerce aro Science stream-rangkoba kulina nangengaha ine KSU-SKHDU-ni vice president Riches Malngiang parakataha.
Ia college-o Science aro Commerce stream-rangko a·bachengatani ja·man chatro chatrirang, biaprangna neng·nikanirangko man·jana gitan ia college-o rikdapgipa building-ko ta·raken nokdonggae on·china gitaba KSU dabiangaha.
“Ia college-ni Science aro Commerce stream-rango re·baenggipa bilsionin chatro chatrirangni admission ra·aniko chinga nikna sikenga,” ine Malngiang aganaha.
KSU-SKHDU president-ni parakatani gitade, Khatarshnong jolo dam 40 songrang aro sak 10,000-mangni gita songdongenggipa manderang dongachim indiba ia jolo da·onan higher secondary skul damsaba dongkujachim.
Khatarshnong jolara, Sohra Civil Sub-Division ning·o diltubatsranggipa biap ong·a ine janapatengon, ia jolo dam 2 secondary skulrang, dam 36 lower primary skulrang aro dam 14 upper primary skulrang donga indiba higher secondary skulde damsaba dongkuja ine Malngiang parakataha.
“Uni gimin ia jolni chatro chatrirang, chubata gadangrango poraiangpana man·na gita ia jolo higher secondary skulrangkoba kulina nangchongmotengaha,” ine Malngiang aganaha.
Indake ong·engon, South West Khasi Hills a·jao District Institute of Education & Training (DIET)-ko kulie on·an baksana residential skulrangko aro SSLC porikka sechakani centre-rangkoba kulichina gita KSU-SWKHDU, a·dok sorkariko didiangaha.
