FKJGP-ni rally-o dosgri manderangko dokgipa manderangoni saksako rim·a

SHILLONG: Meghalaya a·doko chadamberangna kam ka·e cha·ani cholrangko on·jaenga ine adita salrangna skang, Federation of Khasi Jaintia & Garo People (FKJGP) dolni sorkarini kosako jegale jinma re·jomaniko ong·atengmiting somoio dosgri manderangko skatang doka sata dakanio jak donggipa manderangoni saksako rim·na man·aha ine Sombar salo, a·dokni Chief Minister Conrad K Sangma parakataha.
Chief Minister-ni parakatani gitade, ia a·sel ong·anio jak donggipa manderangoni saksako police-rang rim·na man·aha aro gipinrangkoba ma·siahani gimin ia a·selni bidingo minggittam dake FIR-ko ka·aha.
“Badita sak ukode anga parakna sikjaenga indiba ia a·sel ong·anio jak donggipa bang·a manderangkon ma·simanaha. Ia manderang, dosgri manderangko skatang chadrapahani gimin uamangni kosako nanga gita ja·kurangko de·anggen,” ine Sangma aganaha.
Dosgri manderangko chadrapanio sakgittam manderang saknaanirangko man·na nangaha ine janapatengon, saknaa man·gipa manderangna nanga gita sanna bananirangko on·aha indiba uamangni saknaanirang inditana ong·jaha ine Chief Minister parakataha.
Chief Minister-ni parakatani gitade, ia manderangni kragija dake skatang chadrapanichi auto aro scooty-rangoniba bolgni bolgittammang aro Army-rangni gypsy gari bolsaba adita nosto ka·ako man·ahachim.
Sukrobar salo, FKJGP-ni re·jomaniko ong·atanio iandake a·sel ong·ahani gimin Sombar salo ua, a·dokni Home Minister, Director General of Police, East Khasi Hills a·jani Deputy Commissioner aro dingtang dingtang police officer-rang baksa tom·aniko ong·atangahachim.
Ia tom·aniko ong·atani bidingo talataniko on·angengon, mikkangchi iandakgipa a·sel ong·anirangko champengna gita ia tom·anio niamrangko ra·gatani giminba chanchirimangaha ine Chief Minister parakataha.
“Chu·gimik obostarangni gimin chinga chanchirimaha aro nanga gita ja·kurangko de·china chinga police-rangna ge·etaniko on·aha. Mikkangchiba iandakgipa a·selrang ong·taijana gita chinga niamrangko ra·gatani gimin chanchiangaha,” ine Sangma aganaha.
Ian niam retiko rakkianio sorkari aro police-rangni chu·sokgijaniko mesokani ong·ama ine sing·anina aganchakaniko on·angengon, ian rang·gitiksa ong·ahani gimin darangkoba iana dos galna man·jawa ine Chief Minister parakataha.
“Ia a·sel ong·anio sak 1500-na batgipa manderangoni mitamrangsan jak dongahani gimin ia manderangko namen ma·sina man·aiaha aro ian rang·gitiksa ong·ahani gimin pilakan jagokmanpilaha,” ine Sangma aganaha.
Iandakipa re·jomanirangko aro jingjengatanirangko dakna permission-rangko on·engon, pangnan ong·atenggipa dolrangna daito gnangsa ong·engachim ineba Chief Minister talataniko on·angaha.