SHILLONG: Jal Jeevan Mission (JJM)-ni kamrangko chu·sokatanio nambatgipa a·dokrangna boksisko on·anio Meghalaya a·doknaba on·ahani gimin JJM-ni kamrangko chu·sokatani bidingo NPP-chi dilenggipa MDA sorkari, ma·mong sorkarina togiengakon ine Opposition Trinamool Congress (TMC)-ni dilgipa Mukul Sangma, Mongolbar salo parakataha.
Mawryngkneng-o ong·atanggipa TMC-ni block committee meeting-o jinmana aganprakangengon, “Jal Jeevan Mission-ni kamna maikai Meghalaya sorkari nambatgipani boksisko man·aha ine angko sing·aha. Haida MDA sorkari, India sorkarinaba togina a·bachengahakon. Pangnan election-na skang MDA sorkari, an·tangtangni man·gnina manderangko togironga,” ine Sangma parakataha.
Integrated Basin Development & Livelihood Promotion (IBDLP) Program-ni gimin janapatengon, “Ia Basin Development Program-ko MDA sorkari, ra·ongalna jotton ka·ahachim. Kakketko agangenchimode MDA sorkari, ia program-ko chu·sokatangna gita man·jaha,” ine Opposition dolni dilgipa parakataha.
“MDA sorkarini ka·sretgipa kamrangni gimin media-rango parakani gitade, uamang Basin Development Program-koba an·tangtangni namgijagipa miksonganirangna jakkalna a·bachengaha aro ian namen dukni katta ong·a,” ineba Sangma aganaha.
Ia tom·anio Meghalaya TMC-ni president Charles Pyngrope, Opposition dolni Chief Whip George B Lyngdoh aro TMC-ni dingtang dingtang dilgiparangba dongpae bakko ra·angtokahachim.
