TURA: 2012-22 bilsini scholarship-ko bakan chatro chatrirangna on·gnok ine parakatani ja·manoba da·onan scholarship-rangko on·kujaengani gimin A·chik Holistic Awakening Movement (AHAM), dingtangmancha a·dokni Chief Minister Conrad Sangma aro Education Minister Lahkmen Rymbui-na gisik ra·attaianiko on·angaha.
AHAM-ni president George Prince Ch Momin-ni parakatani gitade, adita salrangna skangsan iani bidingo AHAM-ni dilgiparang, Chief Minister-ko gronge agangrikon, scholarship-rangko antisani gisepon watatgnok ine ku·rachakaniko on·atahachim indiba uni ku·rachakaniko on·aoni da·o antigni ong·na sipilengahaoba chatro chatrirang, an·tangtangni scholarship-rangko man·tokkujaengachim.
“Cholgri ong·pagipa chatro chatrirangde, an·tangtangni college fee, lekka ki·tap aro gipin nanga kamrangna scholarship-rangon pangchakna nangtokpaengachim indiba 2021-22 bilsini scholarship-rangko da·onan chatro chatrirangna on·kujaengani a·sel scholarship-rango pangchakna nangenggipa chatro chatrirangde neng·nikanirangko chagrongna nangtokengaha,” ine Momin parakataha.
Sorkariko rikchenga intalan NPP-chi dilenggipa MDA sorkari, lekka porako mongsonggipa ong·e ra·na gita ku·rachakahachim ine janapatengon, scholarship-rangara chatro chatrirangni lekka porako ra·anio man·na nangchongmotgipa aro mongsonggipa bakan ong·ani gimin chatro chatrirangna scholarship-ko pangnan somoi gita on·na nanga ine AHAM-ni president parakataha.
“Uni gimin chatro chatrirangni man·na nangkuenggipa scholarship-rangko ta·raken watatchina chinga Chief Minister aro Education Minister-ko didienga aro chatro chatrirang, ia scholarship-ko man·kujaskal uamang ku·rang on·aniko dontongkujawa,” ineba Momin parakataha.
2021-22 bilsini scholarship-ko bakan chatro chatrirangna watatgnok ine adita salrangna skangsan, a·dokni Chief Minister Conrad Sangma aro Education Minister Lahkmen Rymbui, songbadrangoba parakatahachim ine nikna man·a.
