TURA: Chibragre Wangala A·dam-ni A·chik Heritage Village-o ong·atenggipa 100 Drums Wangala maniani gnigipa salo, Rugala aro jatni ring·susaanirangko ong·atangaha aro ia gnigipa salo, Opposition dolni dilgipa Dr Mukul Sangma, mongsonggipa sokgipa ong·e bakko ra·angaha.
Ia tom·anio Mukul Sangma, jinmana aganprakangengon, ia 100 Drums Wangala manianiko ia biapo ong·atengahani gimin 100 Drums Wangala Festival Committee-ko mittelpilangenba, ia nambegipa biapko Wangala manianiko ong·atna seokaniara jatni namgninan ong·gnok ine parakangaha.
Ia Wangala manianiko ong·ataniara A·chik pagitcham ma·gitchamrangni daka rikaniko ripingna namgipa bewalsan ong·aigija jatni daka rikaniko gipinrangna mesokna gita nambegipa chol ong·a ineba Sangma aganaha.
Ia 100 Drums Wangala manianiko ru·utbea bilsirangna Asanang-o ong·atahaoba dingtang dingtang neng·nikanirang dongani a·sel ia manianiko nambata biapona apjitna gita nangaha ineba ua aganaha.
Ia biapko nambegipa kamna on·gilahani gimin ua songni Nokma aro uni chatchirangkoba mittelpilangaha.
Ia 100 Drums Wangala manianiko ong·atdilchenggipa membor-rangko mittelpilangengon, ua an·tangni chief minister ong·engmiting somoioba ia manianiko ong·atna gita tangka paisarangko bariatahachim ine Sangma parakataha.
Ia Wangala maniani gnigipa salo dongpae jinmana aganprakanggipa gipin manderangara, Meghalaya State Commission for Climate Change and Sustainable Development-ni Chairperson Ferlin CA Sangma, 100 Drums Wangala Festival Committee-ni Chairman Ronald Rikman Sangma aro gipinrang ong·a.
Ia 100 Drums Wangala maniani gnigipa salo dingtangmancha songni nokni kamalrang, Rugala manianikoba dakdilangaha aro uni ja·mano ia Wangala manianio bakko ra·enggipa pilak dolrangan apsan dam bol 100-ko doke Wangalangaha.
Ia gnigipa salo, Ajia Doroa aro pagitcham ma·gitchamrangni ring·anirangko ring·susaatanikoba nikangna gita man·aha.
Ia 100 Drums Wangala maniani gnigipa salo dongpae bakko ra·anggipa gipin manderangara, Rangsakona MLA Zenith Sangma, Salmanpara MLA Winnerson Sangma, MDC Sadhiarani Sangma, Nokma Council-ni President SG Momin aro gipinrang ong·a.