TURA: Garo Hills-o Trinamool Congress (TMC)-ko bilakbatroroatna gita rakbee kamrangko ka·engon, Sombar saloba TMC-ni tom·bimonganiko South West Garo Hills a·jani Salmanpara songo ong·atangaha aro ia tom·bimonganio Opposition TMC-ni dilgipa Dr Mukul Sangma, Rangsakona-ni TMC MLA Zenith Sangma, Salmanpara-ni TMC MLA Winnerson D Sangma aro gipin dilgiparangba bakko ra·angtokaha.
Ia tom·bimonganio Opposition TMC-ni dilgipa Mukul Sangma, jinmana aganprakangengon, a·doko songdongenggipa manderangna pangkamgipa janggi tangani cholko on·na miksonganiosa ua dingtang dingtang department-rang baksa nangrime kamko ka·na Integrated Basin Development & Livelihood Promotion (IBDLP) program-ko a·bachengatahachim indiba ia program-ni tangka paisarangko da·o NPP-chi dilenggipa MDA sorkari gimaattokaha ine matnangataha.
“Manderangna pangkamgipa janggi tangani cholko on·na gitasa anga IBDLP-ko a·bachengate on·ahachim. Da·o ia MDA sorkari, FOCUS scheme-ni ning·o game ge·e cha·giparangna tangka paisarangko suale on·enga ine a·kangenga. Indiba ia FOCUS program-ara IBDLP-ni bakan ong·achim indide tangka paisarangara bachi gimaaha?” ine Sangma sing·doangaha.
Uni chief minister ong·e sorkariko chalaiengmiting somoio ua a·dokni rama jal·langrangko namdapatna raken kamko ka·ahachim ine janapatengon, “Rama jal·langrangko tarina gita anga Asian Development Bank (ADB)-oniko tangka paisarangko man·bae on·aha. PMGSY-kode a·dokni kutcha ramarangko tarina gitasan ma·mong sorkari on·aiani gimin tangka paisarangko chu·onga gita ma·mong sorkarioniko man·ja. Iani giminsa anga Meghalaya Integrated Transport Program-ko a·bachengataha aro bading chiwalanirangko tang·doatna gitaba anga IBDLP program-ko a·bachengate, dingtang dingtang a·songrango donggipa bank-rangoniko tangka paisarangko man·bae on·ahachim,” ine Sangma aganaha.
Ia tom·bimonganio Salmanpara-ni TMC MLA Winnerson Sangma-ba jinmana aganprakangengon, a·dokni chadamberangna kamrangko tikate on·na man·jaengani gimin NPP-chi dilenggipa MDA sorkariko matnange aganangaha.
“Bang·a department-rangon bangbang ong·e dongenggipa kamrang bang·en donga indide sorkari, ia kamrangko mai dakna miksongskaenga? Ia sorkari a·dokni chadamberangna kamrangko ka·e cha·ani cholrangko on·jaenga aro chadamberang, bading chiwalanirangko dake cha·na nangnikengoba, uamangna maming dakchakanirangko on·jaenga,” ine Sangma aganaha.
