TURA: North Garo Hills a·jani gital A·dokgre C&RD Block-ko Mongolbar salo, a·dokni Chief Minister Conrad K Sangma-ni jakchi nokdonggae on·angaha aro ia gital block-ko nokdonggaanio, Kharkutta-ni MLA Rupert Momin, Bajengdoba-ni MLA Pongseng Marak, North Garo Hills a·jani Deputy Commissioner RP Marak aro songni nokni manderangba bakko ra·angtokaha.
A·dokgre C&RD Block-ko nokdonggae on·angani somoio a·dokni Chief Minister, jinmana aganprakatengon, “PA Sangma sagiara, A·dokgre-o songdongenggipa manderang baksa meligipa ong·achim. Manderangni janggi tangani gadangko nambatatna gita uni miksonganirangko pangnan ua (PA Sangma) angna aganrongachim. Ua an·chingni manderangna nambata salrangko on·na nikjumangani dongachim aro da·alo anga A·dokgre-o songdongenggipa manderangni ru·utbea bilsirangna dabienggipa gital block-ko nokdonggae on·na man·ahani gimin namen kusi ong·a. Ia gital block-ko kulianichi ia jolni manderang, sorkarini on·enggipa namgnirangko ta·rakbate aro nambate ra·na man·gnok,” ine parakataha.
Ia gital A·dokgre C&RD Block-ara a·doko gitchambatsranggipa block-rangoni damsa Kharkutta C&RD Block-oniko ma·ekate on·gipa block ong·a aro ia gital block-ni ning·o ge 10,000-mangni gita nokdangrang donggipa dam 43 songrangko man·chapgen.
2018 bilsio MDA sorkariko rikchengaonin uni sorkari, a·dok gimikon songadam nokadamrangona dakanggipa rama jal·langrangko nambatate, manderangna nambata janggi tangani gadangko on·na jotton ka·engachim ineba ua aganaha.
“Chinga songadam nokadamrango rama jal·langrangko namdapatna gita gisiko nange kamko ka·aha aro a·dok gimikon baditaba dam rama jal·langrangko a·bachengate on·aha. A·dokgre-oni Mangsang-ona dakanggipa ramako tarie on·anian ia sorkarini on·kanganiko mesokani ong·enga. Ia ramako tarianirang matchotangengaha aro bakan matchotgnok,” ine Chief Minister parakataha.
An·tangni pagipa aro Lok Sabha-ni gitcham Speaker PA Sangma sagini gimin janapangengon, uni jumangrangoni mingsara Adokgre-o stadium damsako rike on·anian ong·achim aro da·o Adokgre-o Chenanggre Stadium-ko tarina a·bachengatahani gimin ia stadium-ko bakan matchotgnok ine Chief Minister parakataha.
Sorkarini kamrangko manderangona sepangbatatna gita uni sorkari, gital C&RD Block aro Sub-Division-rangko songe on·enga ineba Chief Minister parakataha.
“Manderang sorkarini on·enggipa namgnirangko ra·anio bang·a neng·nikanirangko chagrongna nangronga. Uni gimin chinga C&RD Block-rangko kulidape on·anichi manderangna sorkarini kamrangko sokate on·na jotton ka·enga,” ine ua aganaha.
A·dokgre C&RD Block-ko songe on·angani ja·man ua gital block-ni office nokkoba dikdiksa jakkalsochengna gita kulie on·angjolaha.
