SHILLONG: Re·baenggipa 2023 bilsini Assembly election-na skang, Hill State People’s Democratic Party (HSPDP)-ni MLA sakgnian gipin dolrango napna siengahani gimin Meghalaya Democratic Alliance (MDA)-ni gisepo dolskako mande ra·grikchina aro MLA-rangko rime katjachina HSPDP-ni president KP Pangniang didiataha.
Re·baenggipa 2023 bilsini Assembly election-na skang, HSPDP-ni MLA Renikton Lyngdoh Tongkhar, United Democratic Party (UDP)-o aro sakgipin MLA Samlin Malngiang-ba National People’s Party (NPP)-o napskana siengahachim ine nikna man·a.
Da·o dipet NPP, UDP aro HSPDP dolrang pilakan MDA-o bakrimenggipa dolrang ong·skaachim.
Indake ong·engon, MDA-ni gisepo dolsa dolgipinko mande ra·grikchina aro MLA-rangkoba namgipa gunko mesokchina gita HSPDP-ni president didiataha.
“An·ching MDA-o bakrimenggipa dolrang, dolsa dolgipinko mande ra·grikani dongna nanga aro MLA sakantikon anga namgipa gunko mesokchina didienga,” ine Pangniang parakataha.
MLA-rangni dolsaoni dolsaona katjojoe dongengani gimin janapatengon, “An·ching MLA-rang pilakan, election-on tikit on·e chegipa ong·atna dakchakgipa doltangtangko mittelpilna nanga aro iandake dolsaoni dolgipinona katjojoe dongna nangja,” ine Pangniang parakataha.
HSPDP-ni MLA sakgnian doltangko wate gipin dolrango napskana siengani gimin janapatengon, “Uamang (MLA) sakgnian doltangko watna sienga ine chinga district committee-rangoniko kobor man·soaha. Ia sakgni MLA-rangni constituency-rango candidate-rangko seokna gita chinga district committee-na pakwate on·enga,” ine HSPDP-ni president parakataha.
HSPDP-o MLA-rangni susae ja·mano wate kataniko bang·en nikna man·aha ine janapatengon, mikkangchi HSPDP-ko bilakbatatna uamang rakbate kamko ka·na nangenga ine Pangniang parakataha.
Re·baenggipa bilsini election-o badita dam seat-rango susana sienga ine sing·on, November-ni bon·angachibara ong·jaode December-ni skanggipa antiosa candidate-rangko susaatani gimin ma·sigen ine HSPDP-ni president parakataha.
