SHILLONG: Meghalaya a·doko NPP-chi dilenggipa MDA sorkari, mandena nangchongmotgipa lekka porani kamrangkon nichanggalenga ine Budbar salo Opposition Trinamool Congress (TMC)-ni dilgipa Dr Mukul Sangma matnangataha.
“NPP-chi dilenggipa MDA sorkari, skigiparangkon kamo rakkijaengaha ine chinga knasona man·enga. Songadam nokadamrango uamang skulrangko chipattokaha. Anga an·tangba saksa songadam nokadamo skul poraipagipa ong·a aro anga ia skulrangni a·selsa da·alo iandakgipa gadangona sokpaaha,” ine Sangma aganaha.
Chol ong·pagijagipa bi·sarangni dukni gimin janapatengon, “Songadam nokadamrango skulrangko kulianichi chol ong·pagijagipa bi·sarang bang·en namgnirangko man·engachim indiba ia sorkari, lekka porakon nichanggalskaengaha,” ine Sangma parakataha.
A·doko rama jal·langrang namjani gimin NPP-chi dilenggipa MDA sorkariko matnangatengon, “2011 bilsio angni chief minister ong·engmiting somoio anga pilak PMGSY ramarangko matchotate on·aha. Ua somoio India sorkari chu·onga gita tangka paisarangko on·na man·jani gimin a·dokni gitcham sorkarisa PMGSY ramarangko tariaha,” ine Congress doloni ong·kate TMC-o napanggipa gitcham chief minister aganaha.
PMGSY ramarangko tarina gita tangka paisarangko man·bana 2011 bilsio uni sorkari, World Bank baksa songgigrikanio soi ka·grikaha ineba Sangma parakataha.
Chadamberangna maming janggi tangani cholrangko on·jaenga ine MDA sorkariko matnangatengon, “Chadamberangni nangnikanirangko chu·sokate on·na uamango maming skani dongja aro iako an·ching nikna man·aha. An·chingni chadamberangko bangbang ong·e dongenggipa kamrango gapatna nangchongmota,” ine Opposition dolni dilgipa aganaha.
Lekka porako MDA sorkari nichanggalenga ine TMC-ni dilgipa matnanga
Date:
Share post:
