Cabinet-o donggipa manderang kamtangtangko watna nanga: MPCC President

SHILLONG: November 22 tariko, Mukroh songo ka·saningja ramram manderangko goani a·sel a·doko kajia golmal ong·aniko namatpilna gita man·jaengana, Meghalaya Congress, Chief Minister Conrad K Sangma-chi dilenggipa Cabinet-ko kamoniko watchina aganangaha.
Indake Mukroh songo sak 5 manderangni sianina duk chakpaaniko mesokna prayer meeting-ko dakani ja·mano, Meghalaya Pradesh Congress Committee (MPCC)-ni working president, Pynshngaiñ N Syiem indake aganangaha, ”Sima ario donggipa Khasi manderangko chelchakna a·dokni sorkari dait ra·na nangachim indiba ia kamrangko ka·na uamang namen ja·manchakaha aro chelchakaniko nangmiting somoio chelchakaniko on·jaha.”
”Mukroh-o ong·gipa obosta Meghalaya a·dokni ningaon ong·aha. Assam police-ni a·dokona nape ramram manderangko goe siataniara aiow inmanani ong·a. Indakgipa obostarang ong·anichi a·dokni manderangna maming ka·dongani aro chelchakani dongja ine mesokenga,” ine Syiem aganangaha.
Batanggimin somoirango, Assam police-ni uamangni outpost-ko West Jaintia Hills, Saba-o rikanina bang·a manderangan sorkariko niatpilchina agananiko dakaha. Syiem-ni aganani gitade a·dok sorkari iarangko niatjaha aro manderangni nangnikani gita kamrangko ka·e on·a ja·manchakaha.
Meghalaya aro Assam-ni gisepo maming nanggrikani donggijagipa biapo indakgipa a·sel obostarang ong·ora maidake manderang ka·donganiko man·gen ine ua singdoaniko dakangaha.
”Cabinet-o donggipa gimikan ia obostana daito ra·na nanga aro an·tangtangni kamrangko wate sakgipin, Khasi manderangko chelchakna changgipa manderangna kamrangko wate on·skana nanga,” ine MPCC-ni working president aganangaha.
MPCC-ni president-ni dabiani gitade, Minister-ni bungalow ba nok, official, sorkarina kamko ka·enggipa agipa manderangko chelchakna dongtimenggipa, personal security guards (PSOs) aro gipin security guard-rangko sima ario donggipa songni nokni manderangko chelchakna gita watatskana nanga.
Mukroh-o goa man·e sianggipa nokni manderangoni saksanade sorkarini kamrangko on·a gita nanga ine MPCC-ni working president dabianiko dakangaha.
MPCC-ni vice president, Ronnie V Lyngdoh-ni aganani gitade MDA sorkario legislator bang·batgipa, NPP party-de a·dokni manderangko chelchakna kam ka·ani pal an·tangtangni party-ko bilakatna rake kam ka·giparangsa ong·a.
Indake mijal salni bako sianggipa manderangko mande ra·ani gita candle light service aro prayer meeting-koba ong·ataha. Tom·anio, Nongstoin-ni MDC, Gabriel Wahlang,  Minister gitcham JA Lyngdoh, Mawlai-ni party candidate Marbud Dkhar aro gipin dilgiparangba bakko ra·angaha.