SHILLONG: Adita salrangna skang, West Jaintia Hills a·jani Mukroh songo Assam police aro forest guard-rangni skatang goanchi songni dosgri manderang so·otako man·na nangahani gimin ia a·selko West Jaintia Hills a·jani Mukroh songon bichal ka·china gita dingtang dingtang dolrangni nangrime bikotgipa Save Hynniewtrep Mission (SHM) dabiangaha.
Ia a·selni bidingo Central Bureau of Investigation (CBI)-chi sandirokatna gita ma·mong sorkarini ku·rachakaniko jegalatengon, ia a·selko CBI-chi sandirokgenchimoba, West Jaintia Hills a·jani Mukroh songon bichalko ka·na nanga ine Hynniewtrep Youth Council (HYC)-ni general secretary Roy Kumar Synrem parakataha.
“Ia a·selko Assam-ni West Karbi Anglong-o bichal ka·aniko chinga maming dakeba ra·chakna man·jawa. Mukroh songara Meghalaya a·dok ning·o ga·akgipa biapsa ong·ani gimin ia a·selni gimin West Jaintia Hills a·jaon bichal ka·aniko chinga nangnikenga,” ine Synrem parakataha.
Ia a·selko West Karbi Anglong-o bichal ka·na on·genchimode Mukroh songko Assam a·dokna on·aha gitasa ong·gnok ineba HYC-ni general secretary parakataha.
Ia a·selko Meghalaya a·dok ning·on bichal ka·china gita Meghalaya sorkari dabina nanga ineba Synrem parakataha.
Ia a·sel ong·ani November 22 tarikon ong·ahani gimin Meghalaya Police, ia apsan salon FIR ka·na nangachim ineba ua aganaha.
Ia a·sel ong·anio jak donggipa Assam police aro forest guard-rangko Meghalaya police-rang rim·ena nangachim ine HYC-ni president Robertjune Kharjahrin-ba parakataha.
Ia a·selko West Jaintia Hills a·jaon, District & Sessions Judge-chi bichal ka·na nanga ine Kharjahrin-ba dabiangaha.
“Ia a·selko West Karbi Anglong-o bichal ka·anikode chinga ra·chakna man·jawa,” ine ua aganaha.
