TURA: Bang·a chatro chatrirangni bank account-rangan kam cholijahani gimin ba bimingrang melitokjaengani gimin scholarship-rangko man·tokkujaenga ine sorkarini a·kangenggipani bidingo Constitutional Rights’ Forum (CRF), a·dok sorkariko sing·doataha.
Iani bidingo a·dokni Education Minister Lahkmen Rymbui-na sedoatengon, bang·bata chatro chatrirangni bank account-rangan kam ka·kuengoba scholarship-rangko man·sotokkujaenga indide maio pangchake sorkari iako a·kangenga ine CRF sing·doataha.
“Chingni kobor man·soani gitade, chatro chatrirang jemangan 004 nomborchi bon·egipa token-rangko man·tokachim, uandakgipa chatro chatrirangni scholarship-rangde da·onan naptokkujaenga indide iara maini a·sel ong·enga. Iandakgipa chatro chatrirang maini a·sel an·tangtangni scholarship-rangko man·jaenga,” ine CRF sing·doataha.
Scholarship-rangko man·anio neng·nikanirangko man·enggipa chatro chatrirangni bimingrangko bank-rangoniko ra·enba, chatro chatrirangni neng·nikanirangko ta·raken namatchina gitaba CRF, nangchakegipa department-na ge·etaniko on·china a·dok sorkariko didiataha.
