SHILLONG: Adita salrangna skang, West Jaintia Hills a·jani Mukroh songo ong·anggipa a·selni ja·man a·dokni Chief Minister-san ong·aigija a·dokni Cabinet gimikan kamo chu·sokgijaniko mesokaha ine Sombar salo, a·dokni Opposition Trinamool Congress (TMC) parakatenba, a·doko gital sorkariko ba President’s Rule-ko ra·gatna nangengaha ine dabiangaha.
Sombar salo, dingtang dingtang political dolrangni tom·aniko ong·atani ja·man kobor ra·timgipa manderang baksa agangrikengon, Assam-ni simarango songdongenggipa Meghalaya a·dokni manderang changni chang Assam sorkarini sinjetna jotton ka·ani bidingo Meghalaya sorkarina u·iatahaoba a·dok sorkari, maming chel·chakanirangko on·na man·jaha aro ian sorkarini chu·sokgijaniko mesokaha ine TMC-ni dilgipa George B Lyngdoh parakataha.
“Ia jolrango songdongenggipa manderang an·tangtangni neng·nikanirangko sorkarina u·iatahaoba, ia sorkari maming ja·kurangko de·na gisiko nangjaha. Ia kamo Chief Minister-san ong·aigija chu·gimik cabinet gimikan kamtango chu·sokgipa ong·jahani gimin a·doko gital sorkariko rikskana nangengaha ong·jaode President’s Rule-ko ra·gatna nangskaengaha,” ine Lyngdoh parakataha.
Ia a·selni bidingo sandirokna gita Assam aro Meghalaya sorkarirangni judicial commission-ko songna ku·rachakani gimin an·tangni suk ong·gijaniko parakatengon, ia a·selara Meghalaya a·dok ning·o donggipa Mukroh songosa ong·aha ong·ode maikai Assam-ni songe on·gipa judicial commission, Meghalaya a·dok ning·o kamko ka·na man·gen ine TMC-ni dilgipa sing·doataha.
Apsan daken Meghalaya sorkarini songgipa judicial commission-ba, Assam police aro gipinrangni kosako kamko ka·na man·jawa ineba Lyngdoh parakataha.
CBI inquiry-ko dakna ma·mong sorkari ku·rachakaha ine agangipani bidingo janapatskaengon, da·o dipet iani bidingo name talbrea ong·kujaenga aro ka·genchimoba mai dakgipa inquiry-ko dakgen ine Lyngdoh sing·doataha.
“Ia manderangko Meghalaya a·dok ning·osa so·otahani gimin arrest warrant-ko Meghalaya Police-sa on·na nanga aro dos dakgipa manderangko a·dokni police-rangsa rim·china chinga dabiahachim,” ine ua aganaha.
Ia a·sel ong·ani da·o antisa ong·angpilengahaoba da·onan Meghalaya sorkari, ia a·sel ong·chakgipa biapni gimin a·kanga dongkujaenga ineba TMC-ni dilgipa parakataha.
