TURA: Bristibar salo Executive Engineer PWD (Roads), Resubelpara Division-ni gita Kharkutta-o gital Division PWD (R) office-ko ge·sa additional office aro ge·gipin gital Sub Divisional office-ko Resubelpara-o songangaha.
Biap damgnio oprakaniko Kharkutta Constituency-ni MLA Rupert Momin aro Bajengdoba Constituency-ni MLA Pongseng Marak aro North Garo Hills-ni District Administration-ni a·gipirangni dongpaanio Deputy Speaker aro Resubelpara-ni MLA, Timothy D Shira-chi songangaha.
Manderangni badingchiwalaniko aro songsarrango janggi tangani gadangko tangdoatna nangnike ia ge·gni gital office-rangko songangna nangnikaha. A·jao bang·a ramarangko on·anganio pangchake Kharkutta division-ko aro Resubelpara Sub Division-ko songangna nangchongtenga aro manderangna ta·rake kamrangko ka·e on·angna nanganio kamrang ka·na nangarangba bang·enga. Ge·gni gital office-rangko bikotanio Resubelpara Division-na baljrimanirang olgrokkalgnok. Ge·etanio pangchake nangnikgipa kamrangna manderangko kamo donangna man·a ka·dongsoenga.
Government Notification vide order No.PW/Admn/40/2021/191 tarik Shillong 29th November 2022-ni ning·o Kharkutta Division aro Resu belapara Sub Division PWD (R)-ko songangaha. .
Kharkutta PWD Division aro Resubelpara PWD Sub Division-ko songna uamangni ja·ku ga·dilchenganina Chief Minister Conrad K Sangmako aro PWD-ni official-rangko ge·gni tom·anio mongsonggipa sokgipa ong·e re·bagipa Deputy Speaker aro Resubelpara-ni MLA, Timothy D Shira, gisik ka·tongoni mittelangaha. Ma·mongni aro a·dok sorkarini dingtang dingtang scheme-rangni gita rama jalangrangni ning·o dal·dalgipa project-rangko man·baanina ia biapo songdonggiparang sakkiko on·engaha, ine Shira PWD-ni kamrangko kan·dike agan-janapataniko dakangaha.
An·chingni janggi tanganio rama jalangni gita songsarna aro badingchiwalanirangna dal·begipa namroroani aro silroroanirangko nama rama jalangrangni gita a·dokona ra·bana man·gen aro manderangna pilakni gitan namroroanirangko man·anggen, ine Shira aganaha. Rama jalangrang nambatan baksa a·dok nitorikrikgipa ong·gen aro ning·tugipa biaprangonaba sokangna man·gen, aro biaprango pilakni gita namroroanirangko ra·bana manderangko administration-ona sepangbatatna man·gen, ine ua agandapangaha.
Gital office, jinmani nanganikanio a·doktangni manderangna sepangbate dangdike on·angna man·a ka·dongsoenga. Programme-ko ong·atmiting somoio, Resubelpara-ni PWD (R)-ko a·bachengatani gimin skangni itihas-ko kan·dike agan-talatangaha.
Gipinrang baksa tom·anio Rupert Momin, Kharkutta MLA, Pongseng Marak, Bajengdoba MLA, Ripamchi Sangma, Additional Deputy Commissioner, NGH, Er. CN Sangma, Addl. Chief Engineer, PWD (R) Western Zone, Tura, Er. B Thongni, Superintending Engineer, PWD (R) Williamnagar Circle and Er. S Massar, EE/PWD (R) Resubelpara Division-ni Er. S. Massar dongangpaaha.
