TURA: Garo Hills Autonomous District Council (GHADC)-o kam ka·enggipa manderang ja 29 ong·na sipile an·tangtangni dormaharangko man·tokkujaengani a·sel neng·nikanirangko chagrongna nangtokengon, GHADC-o kam ka·enggiparangba da·o Krismas aro Bilsi Gitalko kusi ong·e manipana man·na gita uamangni man·na nangenggipa dormaharangko da·o Krismasna skangan on·china Association for Democracy & Empowerment (ADE) mol·molataha.
ADE-ni president Dalseng Bira Ch Momin-ni parakatani gitade, GHADC-o kam ka·enggiparangna 2020 bilsini August jamangonin dormaharangko on·ani tik ong·jana a·bachengahachim aro uamangna gisepgriko jasa jagni dake dormaharangko on·ahaoba da·ode dormaharangko on·ani dongsrangjaengahachim.
“Krismas gita dakgipa somoirango GHADC-o kam ka·enggipa manderangni obostako niate chinga namen ka·a be·a maina uamang ja 29 ong·na sipile an·tangtangni dormaharangko man·jaengani a·sel kusi ong·e maniani pal duk mikchi baksasa iandakgipa somoiko re·atska nangtokenga. Meghalaya a·dokni Chief Minister Conrad K Sangma aro GHADC-ni gital CEM, GHADC-o kam ka·enggiparangna ka·sachakanian dongsrangjaha gita nikenga maina sorkarini dingtang dingtang department-rango kam ka·enggiparangde somoi gitan an·tangtang man·na nanganirang man·tokpaenga aro Krismasnaba an·tangtangni dormaharangko somoina skangan man·tokpaenga,” ine Momin parakataha.
GHADC-ni gile man·enggipa kajinarangara, GHADC-o kam ka·enggipa manderangni dormaharangko gamnamangmangde chu·ongna nangachim ine janapatengon, GHADC-ni gile man·enggipa kajinarangko maini gimin GHADC-o kam ka·enggiparangni dormaharangko on·na jakkalna man·jaenga ine ADE-ni president sing·doataha.
“Iano anga GHADC-ni gile man·enggipa kajinarangkosan janapkuenga aro a·dok sorkari ba ma·mong sorkarini gita dakchake on·enggipa tangka paisarangni giminde janapsrangjaenga. Chingni kobor man·soani gitade, GHADC-na a·dok sorkarioniko gong kror 26 tangkarangko chamatna ra·chakmanaha, uni gimin GHADC-o kam ka·enggiparangba Krismas aro Bilsi Gitalni salrangko an·tangtangni nokdang aro ripengskarang baksa kusi ong·e manipana man·na gita ta·raken dormaharangko on·na kam ka·chakatchina chinga GHADC-ni CEM aro MDC-rangko didienga,” ine Momin parakataha.
