SHILLONG: Congress doloni ra·galako man·gipa MLA sakgni, chong·motan Ampareen Lyngdoh aro Mohendro Rapsang, Sombar salo MLA ong·aoniko kam watani ja·man National People’s Party (NPP)-o napangskaaha.
Ia MLA sakgniko rimchaksona gita dingtangmancha NPP-ni tom·aniko Shillong songjinmani Laitumkhrah-o donggipa Fire Brigade ground-o ong·atangaha aro ia tom·anio NPP-ni national president aro a·dokni Chief Minister Conrad K Sangma baksana a·dokni Deputy Chief Minister Prestone Tynsong, sakgipin Cabinet Minister Sniawbhalang Dhar aro NPP-ni state president WR Kharlukhi-ba dongpae, ia MLA sakgniko NPP-ona rimchaksoaha.
Ia tom·anio, Ampareen Lyngdoh-ko NPP-ni official spokesperson dake NPP-ni state president WR Kharlukhi parakatjolaha.
NPP-ona rimchaksoaniko man·ani ja·man, NPP-ni dilgiparangna aro membor-rangna aganprakengon, 2023 bilsini Assembly election-o NPP-ko cheatna gita uni constituency-ni manderang rakbee kamrangko ka·gen ine Lyngdoh, ku·rachakaniko on·angaha.
An·tangko NPP-ona rimchaksoahani gimin ua dingtangmancha NPP-ni dilgiparangkoba mittelpilangaha.
Ia tom·anio, NPP-o napanggipa sakgipin MLA Mohendro Rapsang-ba jinmana aganprakengon, a·dokko re·mikkangdilna gita kamko ka·enggipa NPP aro Conrad K Sangma-ni dilanio uamang ka·dongenga ine parakataha.
Congress dolni gitcham MLA-rangko NPP-ona rimchaksoanio NPP-ni national president aro a·dokni Chief Minister Conrad Sangma-ba jinmana aganprakangengon, Ampareen Lyngdoh, Mohendro Rapsang aro gipin dilgiparangko NPP-ona rimchaksoenba, uamangni NPP-o napanichi Shillong-o NPP-ko bilakbatatna gita dakchakgnok ine parakataha.
“Skangonin chinga apsan ong·na aro apsan ong·e kamko ka·rima gita anga daknikpilaha,” ine Sangma aganaha.
Ia MLA sakgniko NPP-ona rimchaksoanio NPP-ni national vice president aro a·dokni Deputy Chief Minister Prestone Tynsong-ba jinmana aganprakangengon, ia chang election-o NPP, bang·bate seat-rangko chena ka·dongengani gimin itihasko tarina sienga ine parakataha.
Ia tom·aniona bang·bea manderang re·bae bakko ra·ahani gimin mittelpilangengon, Shillong songjinmao NPP, gimik seat damsnikon chegen ine Tynsong parakataha.
Ia tom·anio MLA sakgni baksana Narpuh constituency-ni UDP MDC Emlangky Lamare-ba NPP-o napangaha.
