SHILLONG: Meghalaya a·dokni nokdang ge·antio donggipa me·chik sakpraknan gong 1000/- tangkako on·na ku·rachake Trinamool Congress (TMC)-ni ra·gatgipa Meghalaya Financial Inclusion for Women Empowerment Scheme (MFI WE) ba ‘WE Card’ scheme-ni bidingo Meghalaya a·dokni BJP dol, Election Commission-na badi ka·dona tik ka·angani ja·man, manderangna namgnirangko on·na sikjaengani giminsa ia scheme-ko BJP, champengna jotton ka·enga ine TMC-ni MA George B Lyngdoh matnangatskaaha.
Ia ‘WE Card’ scheme-ni bidingo EC-na badi ka·dona gita BJP-ni manchianggipani gimin janapatengon, ia scheme-ara kangal cholgrirangna tarigipa scheme-sa ong·achim indiba ia scheme-ko BJP, manderangna sokatna sikjaengani giminsa champengna jotton ka·enga ine Lyngdoh parakataha.
“Ian BJP dolni asol mikkangko mesokani ong·enga maina uamang pangnan kangal cholgrirangna dakchakna sikgijagipa aro namroro silroroaniko nangnikgijagiparangsa ong·a. Ian Meghalaya a·doko songdongenggipa manderangni nanganirangna BJP-ni simsakgijaniko mesokaniba ong·enga,” ine TMC Meghalaya-ni dilgipa parakataha.
Ia ‘WE Card’ scheme-ara Meghalaya a·dokni manderangna dangdike on·na miksonge ra·gatgipa scheme-sa ong·a ine talataniko on·angengon, ia apsan dakanggipa scheme-rangkon a·songni pilak biaprango aro gipin a·songrangoba ra·gataha maina iandakgipa scheme-rangan namroro silroroaniko ra·bana manderangko bilakatgipa ong·a ine Lyngdoh parakataha.
Ia scheme-na bimingko segatna gita a·dokni pilak biaprangon me·chikrang re·batokaha ine BJP-ni state president Ernest Mawrie an·tangan ku·rachakahachim ine janapatengon, ian ia scheme-ko manderangni kusi ong·e ra·chakaniko aro an·tangtangni namgnina kam ka·gipa sorkariko nisengenganiko mesokani ong·enga ine Lyngdoh parakataha.
Ia ‘WE Card’ scheme-ara election-ni somoio manderangko salna miksonge ra·gatgipa scheme-sa ong·enga ine adita salrangna skangsan, BJP-ni state president Ernest Mawrie matnangatenba, ia scheme-ni bidingo Election Commission-na badi ka·dona gita manchiangahachim.
‘WE Card’-ko re·anggipa December-ni 13 tariko, TMC-ni dilgipa aro West Bengal a·dokni Chief Minister Mamata Banerjee-ni Shillong-ona re·baanio a·bachengate on·angahachim.
Ia ‘WE Card’ scheme-ara a·dokni nokdang ge·antion me·chik sakprakna japrako gong 1000/- tangkako dakchake on·na TMC-ni ra·gatenggipa scheme ong·achim aro ia scheme-ni namgniko TMC, Meghalaya a·doko sorkariko rikna man·ahaon on·na ku·rachakengachim.