SHILLONG: Meghalaya Assembly election-na da·o adita salrangsan dongaiahaon, West Shillong seat-na susaenggipa candidate-rangni gisepo kattarangchi dinggrikna a·bachengtokskaaha.
West Shillong-oni susaenggipa UDP-ni working president aro gitcham MLA Paul Lyngdoh-ni parakatani gitade, uni bilo pangchake aro bilsi 31-na uni saksa dilgipa ong·e kamko ka·anichi ua West Shillong constituency-o chena gita ka·dongenga.
West Shillong constituency-o Assembly election-na tarisamsoanirang namengaha ine janapatengon, “Anga batanggimin bilsi 31-na manderang baksa kamrangko ka·rimahani gimin kamrangko ka·anio u·i-ma·sigipa mande ong·an baksana anga changgittamna Assembly-ni membor aro changbrina Cabinet minister-ba ong·e nikaha. Da·o anga KHADC-oba executive membor ong·e kamko ka·enga aro angni ia pilak kamrangan angko chegipa ong·atna anga ka·dongenga,” ine Lyngdoh parakataha.
Indake ong·engon, Paul Lyngdoh-ni bilsi 15-na kam ka·anio chu·sokatgipa kamrangna baten ua bilsi 5-ni gisepo kamrangko chu·sokatskaaha ine da·o West Shillong-ni MLA ong·enggipa aro NPP-ni candidate Mohendro Rapsang parakatskaaha.
Batanggimin bilsi 5-ni gisepo ua an·tangni constituency-na mamingkon dakjaha ine matnanganina aganchakaniko on·angengon, ia sing·anikode constituency-ni manderango aro Rangbah Shnong-rangosa sing·na nanga ine Rapsang parakataha.
“Angni chu·sokatgipa kamrangni gimin agangenchimode Rangbah Shnong-rangni ra·bagipa pilak kamrangkon chu·gimik matchote on·aha,” ine West Shillong-ni MLA aganaha.
Ua an·tangde ribbon-rangko ratanio aro pangchakanirangko songe on·anio bang·e bebera·ja maina tangka paisarang pilakan sorkari aro manderangnisa ong·a ineba Rapsang parakataha.
