TURA: Ia chang Assembly election-o Bharatiya Janata Party (BJP)-ni gita Garo Hills-o name dakna ka·dongengoba, bang·a constituency-rangon BJP-ni tikitna dorgasto galgiparang sakbri sakbongarang dongengani a·sel candidate-rangko seokanio neng·nikanirangko man·skana nangenga.
Garo Hills-o gimik dam 24 Assembly constituency-rang donga aro ianoni bang·a constituency-rangon BJP-ni tikitna dorgasto galgiparang, mitamode sakgni sakgittam aro mitamrangode sakbri sakbongarang donga ine kobor on·aha.
BJP-oni koborko on·ani gitade, Garo Hills-ni Dalu, Kharkutta, Mendipathar aro Bajengdoba constituency-rango BJP-ni tikitna dorgasto galgiparang sakbongmang donga, North Tura constituency-oba BJP-ni tikitna dorgasto galenggiparang sakbri donga, Phulbari constituency-o sak 3 donga aro Mahendraganj, Tikrikilla aro uandakgipa gipin constituency-rangoba BJP-ni tikitna dorgasto galenggiparang komibeoba sakgnimang donga.
BJP-ni dilgipa aro Assam Assembly-ni Deputy Speaker Dr Numal Momin-ni parakatani gitade, batanggimin chang election-rango BJP-ko Kristianrangni kosako chakatgipa dol aro a·doko manderangko matchu be·en cha·na on·jawaha ine dingtang dingtang dolrang, manderangna ma·sisretaniko on·na jotton ka·ahani a·selsa manderang BJP-ko namniktokjachim indiba da·o manderang BJP-ni kosako tol·e matnanganirangko ma·sitokahani gimin ia chang Meghalaya Assembly election-o bang·a candidate-rangan BJP-ni tikito susana seksektokengahachim.
Garo Hills-o BJP, komibeoba dam 12 seat-rangkode chena ka·dongenga ine janapatengon, ia election-o BJP-ni membor-rang rakbate kamko ka·genchimode dam 15-mangkon chenaba gnang ine Assam-ni A·chik BJP MLA parakataha.
“BJP dolara namroro silroroaniko ra·bana kam ka·gipa dolsa ong·a ine Meghalaya a·dokni manderang da·o ma·sina aro ra·chakna a·bachengaha aro da·alo manderangni chakpaanirangko on·anian iani sakki ong·a. Skang salrango manderang chingko Hindu party ba Kristianrangni kosako chakatgipa dol aro matchu be·enko cha·na on·gijagipa dol inesa agantokachim indiba da·alo manderang iandake tol·e matnanganirangko ma·sitokaha,” ine Momin parakataha.
Indake ong·engon, Garo Hills-ni bang·a constituency-rangon BJP-ni tikitna dorgasto galgiparang saksana batani gimin candidate-rangko seokanio BJP-ni dilgiparang adita somoirangko ra·kuenga ine kobor on·aha.
