SHILLONG: Meghalaya a·dokni skanggipa engineering college, chong·motan Shillong Government Engineering College-ko Sombar salo, a·dokni Chief Minister Conrad K Sangma-ni jakchi nokdonggae on·angaha aro ia college-ko nokdonggae on·angani somoio a·dokni Education Minister Lahkmen Rymbui-ba dongpae bak ra·angaha.
Rashtriya Uchhatar Shiksha Abhiyan (RUSA)-ni ning·o rikgipa Shillong Government Engineering College-ko Shillong songjinmani Mawlai Kynton Massar-o donggipa Shillong Polytechnic-ni acre 7.8 ong·gipa a·ao rikaha aro ia college-ko rikanio gong kror 26 tangkarang koros ong·ahachim.
Ia Engineering College-ko nokdonggae on·angani somoio a·dokni Chief Minister Conrad Sangma, jinmana aganprakangengon, ia sorkari a·dokni chadamberangna dingtangmancha cholrangko on·na gita batanggimin bilsibongani gisepo dingtang dingtang program-rangko a·bachengate on·aha ine parakataha.
Chatro chatrirangni nanganirangko NPP sorkari mikkango done kam ka·enga aro lekka porani kamrangnan gisik on·bate kam ka·enga ineba ua parakataha.
Sangma-ni parakatani gitade, chadamberangko janggi tanganio chu·sokgiparang ong·atna aro Meghalaya a·dokko mikkangchi namroro silroroaniona ra·angna gita ia sorkari, dingtang dingtang kamni a·bao cholrangko bikote on·engachim.
Ia Shillong Government Engineering College-o Civil Engineering, Electrical Engineering aro Mining Engineering-ko man·chape minggittam Technical Branch-ni Degree course-rangko on·anggen aro ia college-ni branch ge·prakon komibeoba sak 30 chatro chatrirangna biap donggen.
