SHILLONG: National People Party Poll ong·na adita antirangna parakataniko dakani ja·man Congress agana, MDA-ni dolrang matnangani a·bachengataha, indakmitingo manderang gitcham party-o bebe ra·na a·bachengbaha.
Senior Congress leader Ronnie V Lyngdoh agana, Meghalaya-ni sorkari kamko ka·giparang ba salantini kam ka·e cha·giparang da·o Congress-ni bilona sokbapilako nangnikaha, maina Congress sorkari da·o ong·enggipa sorkarina bate namgipa ong·aha.
Congress da·omitingo Meghalaya-ni itihaso skanggipa chu·gimik gital bimangrang aro gital chadamberangchi mitam senior dilgiparang jemangan skangon chang 2 ba chang 3 MLA-rang ong·ahachim, uamang re·baenggipa poll-o susaniko dakgen. T
Indiba voter-rang pangnan gitcham manderangnade vote-ko pu·ongjawa, ine Lyngdoh chanchiaha, ua Gujarat election-ko toe agana, BJP 40 percent-ni gita uamangni bilo dongenggipa MLA-rangko gimatna nangaha aro mitamrangde uamangni kam ka·anirang namjani gimin ticket-rangkoba man·tokjaha.
“Ching secularism aro constitutional-ni guno pangchakaha, aro manderang MDA sorkarina kusi ong·chakjaha, maina uamangni party-o bang·a gitcham dilgiparang donggenchimoba ka·dongsoani gita kam ka·anirangko nikna man·jaha,” ine Lyngdoh aganaha.
Bilsi 135-na gitchamgipa Congress party-ko gisik ra·ate ua agana, da·omitingo party-o darang sitting MLA-rang dongjagenchimoba, gisik ra·kuenggenchimoba Congress 2018 Assembly Poll-o bang·bate seat-rangko man·akoba nikna man·aha.
“Mitamrang a·gilsako watangaha, aro party-o dongjagenchimoba, ia chango bebe ra·na man·pilgijagipa nomborrangko man·gen, indake ong·jagenchimoba MLA-rang bang·batgipa ong·gen,” ine Lyngdoh aganaha.
