SHILLONG: Re·baenggipa February-ni 27 tariko ong·atna sienggipa Meghalaya Legislative Assembly-ni election-na skang, Voice of the People’s Party (VPP)-ni ‘ruan’ noksako Sonibar salo oprake on·angaha.
Ia noksako VPP-ni president Ardent Miller Basaiawmoit, Smit songo VPP-ni tom·aniko ong·atanio oprake on·angaha.
“Ruanara VPP-ni bebera·ani, miksongani aro niamrangko ning·tue mesokgipa ong·ani gimin chinga ‘ruan’-ko chingni noksana seokaha,” ine Basaiawmoit, kobor ra·timgiparangna parakataha.
Uamang a·doko rongtalgipa politics aro namgipa sorkariko ra·bana miksonganirang donga ine janapatengon, a·doko ong·gija dakgipa kamrangko bon·atna VPP krenge kamko ka·gen ine VPP-ni president parakataha.
“Chinga bebera·a ku·cholsan kamko ka·anichi chinga iako chu·sokatna man·gen,” ine Basaiawmoit aganaha.
Ia noksako Election Commission, re·baenggipa February-ni 27 tariko ong·atenggipa Assembly election-o bak ra·pana man·na gita VPP-na on·angahachim.
Da·o dipet VPP-ko state party ine recognize ka·kujaengoba party-ko Election Commission-o segatmanahachim.
State party ine recognize ka·ako man·na gita aro dongkamnagipa noksako man·na gita ia dol, election-o komibeoba 6 percent vote-rangko man·e komibeoba seat damgniko chena ba komibeoba 3 percent vote-rangko man·e komibeoba seat damgittamko cheskana nangengachim.
Ia Assembly election-na VPP-ni sak 16 candidate-rangko adita salrangna skangsan parakatmanahachim aro ia sak 16 candidate-rangoni VPP-ni president aro gitcham MLA Ardent Basaiawmoit baksana da·o ong·enggipa MLA Adelbert Nongrum-ba candidate ong·engachim.
Ia Assembly election-o VPP-ni president Ardent Basaiawmoit, Nongkrem constituency-oni aro Adelbert Nongrum, North Shillong constituency-oni susaangskana siengachim.