RESUBELPARA: Re·baenggipa February jani 27 tariko ong·atna sienggipa Meghalaya Legislative Assembly election-ko tom·tomao aro nama bewalo ong·atna man·na gita manderangko bakrimchina aro Election Commission of India (ECI)-ni on·gimin niamrangko pe·e, ong·gija dakgipa kamrangko nikgenchimode u·iatskachina gita North Garo Hills a·jani District Election Officer (DEO) didiataha.
North Garo Hills a·jao dam 4 Assembly constituency-rang donga aro election-ni tarikrangko parakataonin Model Code of Conduct (MCC)-ko ra·gatahani gimin a·doko songdongenggipa manderangna aro election-o susaenggipa dingtang dingtang dolrangna niamrangko donmanahachim.
“IPC Section 171.13-o dongimin niam gitade, election-ni somoio tangka paisarangko ba gam-jinrangko on·gipa ba ra·chakgipa manderangko bilsisana pattoko donna ba daiko gamatna ba minggni sastikon on·na gita niam donga,” ine North Garo Hills a·jani DEO parakataha.
Election-o susaenggipa ba seokgipa mandena ka·mikkenatanirangko on·genchimoba apsan dakgipa sastirangko on·ani niamrang donga ine janapatengon, tangka paisa on·gipa ba ra·chakgiparangko aro susaenggipa candidate ba seokgiparangna ka·mikkenatenggipa manderangko nirikkina gita Flying Squad aro Static Surveillance dolrangko donatmanaha ine DEO parakataha.
Niamrangko ja·rikchina aro iandakgipa kamrangko nikgenchimode ta·raken u·iatskachina didiatengon, iandakgipa u·iatanirangko 18003453757 aro 7005831909 nombor-rangona je somoioba ka·e u·iatna man·gen ine DEO parakataha.
ECI-ni dongimin niam gita, tangka paisarangko ra·bitani bidingo maming talatani gri gong 50,000 ba una bate ra·bitgenchimode ba jakkalgenchimode, uandakgipa tangkarangko Election Expenditure Monitoring-na dongimin Flying Squad ba Static Surveillance dolrang rim·na niam donga ineba DEO parakataha.
Bia ka·anirangna, admission-rangna ba gipin nangchongmota kamrangna indita tangkarangko ra·bitna nanggenchimode sakkirang baksana PAN Card, Business Registration Certificate, cash book ba uandakgipa sakkini copy-rangko ra·bitchina gitaba DEO u·iataha.
