TURA: Re·baenggipa February-ni 27 tariko ong·atenggipa Meghalaya Assembly election-o National People’s Party (NPP), dam 33 ba dam 34 seat-rangkode chetelaigen ine ka·dongtokengon, NPP-chi dilgipa sorkarini maming kamrangko chu·sokate on·jahani gimin ia chang election-o Trinamool Congress (TMC)-kon manderang seokskagnok ine TMC-ni dilgiparang ka·dongchakenganiko parakatskaaha.
North Tura constituency-o TMC-ni candidate ong·e susaenggipa Rupert M Sangma-ni parakatani gitade, batanggimin bilsi bongani gisepo NPP-chi dilgipa sorkari manderangna maming namgnirangko on·na man·jahani gimin ia chang election-ode a·dokni manderang TMC-ko seokskagnok aro a·dok gimiko komibeoba dam 30-na baten seat-rangko chegen.
“NPP-chi dilanggipa sorkari, Christian a·doko joa kal·aniko niamo ong·atna jotton ka·an baksana manderangni bang·en nanganirangko chu·sokate on·na man·jahani gimin manderang NPP sorkariko jegaltokaha. Khasi-Jaintia Hills-ona aro Garo Hills-ona NPP-ko manderang jegaltokengani gimin ian TMC-na namgipa chol ong·skaengaha,” ine TMC-ni candidate Rupert Sangma parakataha.
North Tura-ni TMC candidate Rupert Sangma, da·al Sombar salni bakon an·tangni nomination-ko file ka·enaba gnang ine ka·dongsotokenga.
Rupert-ni parakatani gitade, ia sal somoirango bang·bea chadamberangan TMC-o naptokengani gimin ia election-o ua chegipa ong·telgen ine ka·dongenga.
Ua saksa Tura-ni gitcham MDC-ba ong·e, onbatgipa gadangni manderang baksa kamrangko ka·naba changaha ineba Rupert parakataha.
“TMC-ko West Bengal a·dokni political party ine agananiara ku·sikchi agananisan ong·aia maina TMC-ba BJP, Congress aro gipin dolrang gitan national party ong·paenga. Chinga pilak biaprangonikon chakpaanirangko man·soenga aro chingna maming neng·nikanirang dongjawa,” ine ua aganaha.
