RESUBELPARA: Constituency-ni manderangna on·gipa dingtang dingtang scheme-rangko jakkalsreta ine matnanggipa mandena, Mendipathar-ni MLA aro ia chang NPP-ni candidate ong·e susaenggipa Marthon Sangma, legal notice-ko on·ataha.
“Angni kosako matnanganirangara tol·e matnanganisan ong·aia aro angni bimingko tol·e man·atna jotton ka·anisan ong·aiani gimin angni kosako matnanggipa mandena anga legal notice-ko on·angaha. Niam gitade CGI sheet-rangko te 2200 nokdangrangsan man·ani ong·aiachim indiba anga te 4000 nokdangrangna baten CGI sheet-rangko sualaha. Beneficiary list-ko Block-na submit ka·kujaengani giminde anga ia tangka paisarangko jakkalsreta ong·jachim,” ine Marthon parakataha.
2018 bilsionin Mendipathar MLA, beneficiary list-ko on·kujaenga ine RTI ka·anio ma·siani ja·man, re·anggipa jao mande saksa Shillong-o press conference-ko ong·atenba, MLA scheme-rangko jakkalsretaha ine uni kosako matnangahachim.
Indake ong·engon, ua CGI sheet-rangko man·na donsogimin te 2200 nokdangrangna baten te 4000 nokdangrang batpile CGI sheet-rangko suale on·aha indiba ua beneficiary list-kosan on·kujaengachim ine Marthon parakataha.
Ia chang Assembly election-o ua gipin sakbonga candidate-rang baksa Mendipathar constituency-o susataiengachim aro ia changoba ua chepiltaina ka·donganiko parakataha.
Mendipathar constituency-o namdapatna nangenggipa kamrangni gimin janapatengon, skanggipao rama jal·langrangko namdapatna nangenga aro gital C&RD Block-ko man·na nangenga ine NPP-ni candidate parakataha.
