SHILLONG: National Health Mission-ni ning·o COVID-19-ni kamrangna chame on·atgipa gong kror 119-oni gong kror 43-ni hisapde dongja ine matnangenba, iani bidingo inquiry-ko dakchina dabie, North Shillong constituency-ni Voice of the People’s Party (VPP) candidate Adelbert Nongrum, Sadar Police Station-o FIR ka·angaha.
Adita salrangna skangsan iani bidingo, RTI activist Disparsing Rani-ba sorkariko sing·doangahachim ine nikna man·a.
FIR ka·ani ja·mano kobor ra·timgipa manderang baksa agangrikengon, Assembly-ni Autumn Session-ko ong·atanio COVID-19-na koros ong·gipani bidingo ua sing·doahachim aro COVID-19-ni kamrangna ma·mong sorkari gong kror 76 tangkarangkosan chamataha ine a·dokni health minister James PK Sangma agane, National Health Mission-ni ning·o chamatgipa bangki tangka paisarangko jakkalsretna jotton ka·aha ine Nongrum parakataha.
Ua somoio health minister-ni iandake aganchakaniko on·aniara Meghalaya a·doko COVID-19-ni kamrangna ma·mong sorkarini chame on·atgipa tangka paisarangko jakkalsretaniko mesokanisa ong·aha ineba Nongrum parakataha.
Meghalaya a·doko COVID-19-ko warachakna kamrangko ka·anio a·dok sorkari, gong kror 816 tangkarangko koros ka·aha ine health minister, Assembly-o parakahachim ineba nikna man·a.
