SHILLONG: Meghalaya a·dokko ‘Five Star’ a·dok ong·atna gita Congress dolni ku·rachakaniara uamangni ‘jumang’ nikanisan ong·aia maina adita salrangni gisepon uamangni ju·mangko bon·atsrangna siengaha ine Sonibar slao, National People’s Party (NPP)-ni ku·wattimgipa Bajop Pyngrope parakataha.
“Uamang (Congress) sorkariko rikna man·jawa aro uamangni ku·mikchetanirangara election-na ku·mikchetanirangsan ong·aia. Election-ni ja·manode uamang opposition ong·en asongtaina nangaigen,” ine Pyngrope parakataha.
Congress dolo chenagipa candidate-rangba dongja aro Congress candidate-rang gimikan niamnasan susatokaienga ineba ua aganaha.
Meghalaya Assembly election-na campaign ka·aniko a·bachengatani bak gita Bristibar salo, Congress dol, Meghalaya a·dokko ‘Five Star’ a·dok ong·atna ‘Mingbonga On·kanganirangko’ parakatahachim.
Indake ong·engon, a·doko Congress sorkariko chalaiengmiting somoion uamang mamingkoba dakna man·jaha aro da·o Meghalaya a·dokko ‘Five Star’ ong·atani gimin aganenga ineba NPP-ni dilgipa matnangataha.
Meghalaya a·dokko ‘Five Star’ a·dok ong·atna miksongenga ong·ode maini gimin a·song gimikon Congress-ko manderang bebera·jaenga ineba Pyngrope sing·doataha.
Assembly election-na skang apsan bakrimgipa dolrangoni matnanganirangko NPP, warachakna nangenga ineba ua aganaha.
“Chinga dal·batsranggipa dolsan ong·e gipin dolrang baksa bakrime sorkariko chalaiaha. Chinga namgnirangko man·namangmang uamangni kosako mamingkoba aganjawa,” ine Pyngrope parakataha.
