TURA: FOCUS aro FOCUS Plus program-rangko jakkale National People’s Party (NPP)-ni national president Conrad Sangma, an·tangtangni niam gri man·gipa tangka paisarangko pindapna jotton ka·enga ine Budbar salo, South Tura constituency-ni BJP candidate Bernard N Marak matnangataha.
South Tura constituency-o BJP-ni Bernard Marak-ba a·dokni chief minister aro NPP-ni candidate Conrad Sangma baksana Trinamool Congress (TMC)-ni Richard Marak aro United Democratic Party (UDP)-ni John Leslee K Sangma baksa susaengachim ine nikna man·a.
Budbar salo, Tura-ni BJP office-o kobor ra·timgipa manderang baksa agangrikengon, FOCUS-ni niamrangko pe·e, NPP-ni candidate Conrad Sangma, ia scheme-chi manderangko salna jotton ka·enga ine Bernard matnangataha.
“Manderangko chief minister-ni nokona uamangni ID-rang baksa okamate, maming form-rango soi ka·atgijan gong 5000 tangkako, manderangni account-rango chipatenga. Ian sorkarini scheme-sa ong·achim aro manderang ia scheme-ko ra·na gita uni nokoniko ong·ja indiba Agriculture department-osa dorgastoko galna nangachim. Ian uamangni ia scheme-ni tangkarangchi manderangko salna jotton ka·aniko mesokani ong·enga. Iani bidingo sandirokatchina anga official-rangko didienga,” ine Bernard parakataha.
Marak-ni parakatani gitade, ia scheme-ni tangkarangko mai kamrangna aro maikai jakkalna nanga, uarangkoba manderangna talate on·jaengachim.
“Ia sorkarini ning·o bang·en tangka paisarangko jakkalsretaha aro iako pilakan ma·sitoka. Iani bidingo chinga ku·rangko on·ahani giminan angko uamang nisan ka·aha. Chingni badi ka·giparangni bidingo maming ja·kurangko de·jaha,” ine BJP candidate aganaha.
Garo Hills-o aro Tura jillaoba ramarangko name tarijaenga ineba Marak matnangataha.
Ia election-o an·tangni cheani cholrangni gimin janapatskaengon, indita manderang una chakpaanirangko on·engani gimin ua chena ka·dongchongmotenga ine Marak parakataha.
FOCUS scheme-chi NPP, niam gri man·gipa tangkarangko pindapna jotton ka·enga: BJP
Date:
Share post:
