TURA: Sukrobar salo, a·dokni chief minister aro National People’s Party (NPP)-ni national president Conrad K Sangma, Rongjeng constituency-ni NPP candidate Jim M Sangma-na Rongjeng aro Mangsang songrango campaign ka·angaha.
Ia songrango Sangma-ni campaign ka·anio, NPP-ni ku·wattimgipa aro Williamnagar-ni NPP candidate Marcuise N Marak-ba bakko ra·angaha.
Ia song damgnio Rongjeng constituency-ni NPP candidate-na campaign ka·angengon, NPP-chi dilgipa sorkarina skang a·doko sorkariko chalaianggipa gitcham sorkarirangni bilsi 15-ni gisepo chu·sokatgipa kamrangko ia sorkari bilsi bongani gisepon chu·sokatna man·aha ine parakataha.
Meghalaya a·dok gimikon NPP-ni balwa ta·rakbee balenga ine janapatengon, ia changoba NPP, sorkariko riktaina siengani gimin gipin dolrangna pu·onede maming namgniko man·jawa ine Sangma parakataha.
Batanggimin bilsi bongana Rongjeng-ni MLA Jim Sangma, constituency-ni manderangna bang·en namgnirangko ra·bae on·aha ine janapatengon, ia changoba Rongjeng constituency-o namroro silroroaniko bang·bate man·angkuna gita unan pu·ontokna nangenga ine NPP-ni national president, Rongjeng constituency-ni manderangko didiangaha.
Ia tom·anio NPP-ni ku·wattimgipa aro Williamnagar constituency-ni NPP candidate Marcuise Marak-ba jinmana aganprakangengon, batanggimin bilsi bongani gisepo Conrad Sangma-ni dilanichi NPP sorkari, a·dok gimikon tom·tomaniko ra·bana man·aha aro tom·tomanirangko man·pilengahani a·selan ia jolrangoba manderang bading chiwalanirangko tang·dobataina man·engaha ine parakataha.
Batanggimin bilsi bongani gisepo NPP sorkari, a·dok gimikon dingtanganiko ra·bana man·ahani giminsa dingtang dingtang dolni dilgiparang da·o NPP-o katnaptokengaha ineba Marak aganaha.
