TURA: Kristianrangni ring·ronggipa ‘Jisuni ja·man anga ja·rikgen’ ingipa gitko politics-ni gita taridape ring·ahani gimin National People’s Party (NPP)-ni adita sak membor-rangni kosako South Tura constituency-ni United Democratic Party (UDP) candidate John Leslee K Sangma, Tura Police Station-o FIR ka·angaha.
‘Jisuni ja·man anga ja·rikgen’ ingipa gitko NPP Williamnagar-ni general secretary Georgeman Marak, NPP-ni gipin membor-rang baksa English-chi ‘I have decided to follow NPP….’ ine ring·skaahachim aro ia video-ko bakan social media-rango watpripraataniko niksona man·ahachim.
Indake ong·engon, ia gitara Kristianrangni Gitel Jisu Kristoko ja·rikna an·tangtangko on·kange ring·na tarigipa gitsa ong·achim aro ia gitko iandake politics-o nangataniara Kristianrangko chonnikani gita ong·aha ine Tura Baptist Mondolini membor aro South Tura constituency-o UDP-ni candidate ong·e susaenggipa John Leslee Sangma talataniko on·angenba, NPP-ni dilgipa Georgeman Marak aro gipin membor-rangni kosako FIR ka·doangaha.
“Ia gitara chinga Kristianrangni Gitel Jisu Kristoko ja·rikna aro namgipa janggi tanganio re·mikkangna an·tangtangko on·kangani gitsa ong·achim indiba ia manderang, ia gito segimin gita Jisu Kristoni pal NPP aro Conrad Sangma-ko mingskae ring·aha aro ian Kristianrangko chonnikani ong·aha. Ian IPC-ni Section 295A-ko pe·ani gitaba ong·ahani gimin rakgipa sastirangko man·na kraani ong·a,” ine Sangma-ni seatgipa FIR-o parakataha.
Adita salrangna skangsan, Nagaland a·dokoba ia apsan gitkon badiaba political dolni ong·gija dake ring·aniko nikna man·ahachim aro iani bidingo Nagaland a·dokni Kristian dilgiparang raken jegalaniko parakatahachim.
