RESUBELPARA: Re·baenggipa February 27 tariko Meghalaya Legislative Assembly-ni general election-ko ong·atengani gimin Mongolbar salo, North Garo Hills a·jani Special Expenditure Observer B Murali Kumar, North Garo Hills a·jani District Magistrate, ADC, SP, Micro Observer-rang, Expenditure Observer aro gipin official-rang baksa a·jani nodal officer-rangko gronge, uamangni dakna nanggni kamrangni bidingo agan-talate on·angaha.
Ia tom·anio Election Commission-ni watatako man·gipa Special Expenditure Observer, Assembly election-na tarisamsoaniko nipilangengon, election-ko jakgitele aro nama bewalo ong·atna man·na gita election-ni niamrangko bilakbate nirokchina SST aro FST-rangna agan-talataniko on·angaha.
