Rajabala-ni UDP candidate-ko police cholako gangipa manderang chadrapna jotton ka·a

TURA: Mongolbar pringwalo, Rongadotgre songo ong·atanggipa election program-oni Tura-ona re·bapilengmiting somoio Rajabala constituency-ni United Democratic Party (UDP) candidate Ashahel D Shira-ko ma·sina man·gijagipa manderang, champengsoenba chadrapna jotton ka·ahani gimin ua ia manderangni kosako FIR ka·doangaha.
Koborko on·ani gitade, Mongolbar pringwalni 3:00 bajimango ia manderang, ML-02 1165 police gario, Selsella sokna skang Haldibari aro Kalpara songni gisepo donggipa ramao, Shira-ni gariko champengsoe, garini do·garangko odrana jotton ka·ahachim.
“Ia gario mande sakgittamde police-rangni gandingrangko ganachim aro saksade ramram gandingrangko ganachim. Uamangoni saksa chingko champengsoenba ching garini do·gako odrana jotton ka·aha aro gipinrangde bolrangni janggilchipak, an·tangtangni silchidarerangko ra·e dongsoahachim. Indake ong·genchimoba uamang angni PSO-ko nikon aro gipin bolgni garirangba ua biapona sokbaon, bakan katpilna jotton ka·ahachim,” ine UDP-ni candidate, Police-rangna sedoatgipa FIR-o parakaha.
Shira-ni parakatani gitade, ia manderang ua biaponi katna jotton ka·on, uamangko Shira-ni PSO aro unbaksa re·baenggipa gipin manderang champengenba, uamangni kamni ID-rangko mesokchina dabiaha indiba uamang an·tangtangni ID-rangko mesokna man·jaha.
“Chinga sakkina uamangko video aro photo-ba ka·e ra·aha aro uamangni ra·bitgipa silchidareara police-rangni jakkalgipa silchidare ong·ja indiba election-na manderangni police-rango donchenggipa silchidarerangsa ong·achim ine chinga nikaha. Maini gimin aro maikai election-na manderangni police-rango donenggipa silchidarerangko uamang jakkalna man·aha? Ma angko ia manderang, ia silchidarerangchi so·otenba dakait dakgipa manderang ba niam gri saw mill-rangko chalaienggipa manderangsa so·ota ine mesokna jotton ka·ahachimma?” ine Rajabala constituency-ni UDP candidate sing·doataha.
Ia a·selni bidingo ua Rajabala police station aro Phulbari police station-o case ka·aha ine talatangengon, FIR-o ua NPP-na kam ka·giparangko biming mingahachim indiba da·onan police-rang, ia a·selni bidingo am·sandianirangko dakkujaenga ine Shira matnangataha.
Uko chadrapna jotton ka·gipa manderangara police-ranganchimma ma uni kosako chakatgipa gipin dolrangni watatgipa manderangsachimma ine janapatengon, ia a·selni bidingo ta·raken sandirokatchina gita UDP candidate dabiangaha.