Shillong: Knal Sombar salo a·doko ong·enggipa puonani sal ong·na skang campaign ka·anirang matchote jrip jrip ong·engmitingo somaio rakbate nirikkanirangko dakna Election department ja·kurangko de·enga.
Assembly election-rangna campaign ka·ani mijal Sonibar-o attam 4:30 bajion matchotaha.
“Ia konta 48-na jripjrip ong·enga. Chinga political party-rangna ka·donganiko dakenga aro je niamrangko ja·rikna nangenga rules aro regulation-rang chingo donga,” East Khasi Hills-ni District Election Officer (DEO), Sibhi Chakravarthy Sadhu, Polo ground-o EVMs strong room-ona re·angmitingo kobor ra·timgiparngna aganaha.
Minggipin fly guard-rang aro surveillance ba nirikkigipa dolrang pilakkan puongiparangko rope tangka suala ba jeba gipin campaign ka·na man·jana gita konta 48-o raken nirikkianggen, ua aganaha.
Joltangni manderang aro security agency-rangko ma·siate mikrakatani ja·kurangko de·enga, DEO agandapaha.
Election-ni somaimitingo darang napna ba ong·katna man·jana gita a·songgipini sima-ariko mohor su·aha, Sadhu u·iataha.
Indake ong·engon statistics-ni gita re·anggipa changni election-ko tosusae tangka, pekgipa sam, IMFL aro a·songtango tarigipa chu indakgiparangko rim·anirang da·o bang·bataha ian puongiparangko ropna chu ba tangkako jakkalna man·jana bang·a dolrangni nirikkiani bilakbatako nikenga, ua u·iataha.
Mijal Sonibar-o bang·a polling station-rangona gimik gimang dol 75-ko watataha aro bangki dolko da·alo watatgen, DEO aganaha.
“Pilak EVM-rangkoba tiktak tarie donmanaha. CrPF dolrang kenchakani ba kenani dongbregijagipa polling station-rangona re·angengaha. Kenchakani donggijagipa polling station-rangona polling team baksa dolsa donggen,” Sadhu u·iataha.
Ge·sni constituency-rangna EVM-rang baksa mal-bosturangko mijalo on·aha jekon uamang da·alo bangki polling team-na mal aro EVM-rangko sualgen, ua aganaha.
“East Khasi Hills-o gimik gimang ge 884 polling station-rang donga. Sohiong constituency-o poll ong·jawaha, uno polling station ge·prako sak bri police-rang aro sak 25 reserve polling personnel-rang donggen,” DEO aganaha. Gimik gimang ge 97 ge·gipin polling station-rang donga, ua u·iataha.
