SHILLONG: MDA nominee aro North Turani NPP MLA Thomas A Sangma, darangba susasekgipa gri, da·al Meghalaya Legislative Assembly-ni Speaker-na seokako man·nasienga.
U·iatani gita, opposition party-rangoni Assembly Speaker-ni post-na darangba nomination file ka·gipa dongjaha indake Pa Sangma-ko ku·cholsan ong·e susasekgipa grian da·al House-ni Speaker ine parakatanggen.
Pa Sangma, speaker-ni post-na susana gita state Assembly-ni Commissioner aro Secretary Andrew Simons-ni mikkango mija Mongolbaro nomination file ka·ahachim.
Thomas A Sangma batanggimin term ba somoio, Chief Minister-ni Adviser ong·e kam ka·ahachim.
Vote of confidence-koba da·al salni bakon dakanggen aro Conrad Sangma-ni re·dilgipa MDA 2.0, da·o dipet sak 59 member house-oni sak 45 memborrangni chakpaaniko man·enga.
Da·oni gitalgipa bakrime rikgipa sorkario NPP (26), UDP (11), BJP (2), PDF (2), HSPDP (2) aro sakgni Independent MLA-rang bakrimenga, indake da·al House-o bil tosusaaniko dakanio Conrad Sangmana neng·nikani dongjawa.
