SHILLONG: Bharatiya Janata Party (BJP) aro Hill State People’s Democratic Party (HSPDP) dolgnian, an·tangtangni gisepo doltangtangna tikatgimin Cabinet-ni biapko, bilsigni ata ka·e sualgrikna tik ka·aha ine Bristibar salo, a·dokni Chief Minister Conrad K Sangma parakataha.
Iani bidingo kobor ra·timgipa manderang baksa agangrikengon, BJP aro HSPDP MLA-rangni gisepo Cabinet-ni biaprangko sualgrikna gita an·tangtang chanchirimaha ine Sangma parakataha.
“Cabinet-ni biapko sualgrikani bidingo da·o dipet BJP-de angna seachi u·iatmanaha indiba HSPDP-onikode seachi u·iataniko anga man·soa dongkuja,” ine Sangma aganaha.
Apsan daken HSPDP-ni Cabinet Minister Shakliar Warjri-ba an·tangna tikatgimin Cabinet-ni biapko HSPDP-ni sakgipin MLA Methodius Dkhar baksa sualgrikgen ine parakataha.
Cabinet-ni biapko sualgrikani bidingo BJP-ni gita a·dokni Chief Minister-na seachi u·iatengon, BJP-na tikatgimin Cabinet-ni seat damsako bilsigni atana AL Hek jako ra·angani ja·man 2025 bilsini August 7 tarik dipet bilsigni atana sakgipin MLA Sanbor Shullai-na on·skana gita BJP-ni dilgiparang aro MLA sakgnini gisepo tik ka·aha ine BJP-ni state president Ernest Mawrie parakatahachim.
Iani bidingo MLA sakgnikoba mande ra·grikchina aro namgipa sorkariko rikna man·na gita sakgnini gisepo ma·sichakgrikani dongchina gita aganmanaha ineba Mawrie parakatahachim.
NPP-chi dilenggipa MDA 2.0-o bakrimenggipa United Democratic Party (UDP)-ni gimin sing·skaon, da·o dipet UDP-ko dilenggiparangoni iani bidingo maming u·iata dongkuja ine Chief Minister parakataha.
“Ian uamangni ning·o ong·enggipa kamsa ong·a aro UDP MLA-rangni gisepo Cabinet berth-ko sualgrikani bidingo angna maming u·iata dongkuja,” ine Sangma aganaha.
Chol ong·genchimode gipin MLA-rangkoba Cabinet-o rimnapna jotton ka·angugen ine janapatengon, da·o dipet Cabinet-ni biap dambriko Garo Hills-ni membor-rangna aro damchetkode Khasi-Jaintia Hills-ni membor-rangna on·aha ine Chief Minister parakataha.
“Membor-rang pilakan a·jatangtang aro joltangtangko represent ka·na nangniktokgen indiba cholrang namen komiani gimin sakantikode Cabinet-o rimnapna man·ja,” ine Sangma aganaha.
