TURA: India sorkarini Ministry of Information & Broadcasting-ni ning·o donggipa Central Bureau of Communication Tura Field Office-ni gita salgnina ‘Azadi Ka Amrut Mahotsav’-ni bidingo ong·atenggipa photo exhibition-ko Bristibar salo, West Garo Hills a·jani Deputy Commissioner Swapnil Tembe, Tura-ni District Auditorium-o a·bachengate on·angaha.
Ia photo exhibition-ko a·bachengatanio Jengjal-o donggipa 100 Bn BSF-ni Commandant Ajai Tiwari, DDK aro DIPR-ni official-rang, Tura Government College-ni skigiparang aro dingtang dingtang institute-ni chatro chatrirangba dongpae bak ra·angtokaha.
Ia photo exhibition-ko ong·atanio, 1947 bilsini August 15 tariko British-rangni sasononiko jakgitel ong·atna krengdilanggipa pagitcham ma·gitchamrangni noksarang aro sipairangni jakkalgipa dingtang dingtang silchidarerangkoba mesokna gita donaha.
Ia photo exhibition-ko a·bachengate on·angani somoio West Garo Hills a·jani Deputy Commissioner, jinmana aganprakangengon, a·songko jakgitel ong·atna gita an·tangtangko on·kange krengdilanggipa pagitchamrangni kamrangko gisik ra·atpilangenba, uamangni dakmesokanggipa kamrangko pangnan gisik ra·china aro daksningchina gita manderangko aro mongsongbate chadamberangko didiangaha.
India a·songni cricket kal·ani somoirango pangnan a·song gimik chakpaaniko on·ronga ine toe janapangengon, India a·songo dingtang dingtang jat aro toromni manderang songdong a·chaengoba pilakan ku·cholsan ong·e janggi tangtokenga ine Tembe parakataha.
India a·songni niam bidiko on·gimin bilrangchi jakgitele janggi tangengon, an·tangtangna on·gimin daitorangko pangnan gisik ra·china gitaba ua manderangko didiangaha.
