SHILLONG: Adita salrangna skang matchotanggipa Meghalaya Assembly election-o seat dambriko chee bilakbatatako man·ahani gimin Voice of the People’s Party (VPP)-ko Khasi-Jaintia Hills a·jarangosan ong·aigija Garo Hills-onaba gipatna miksongenga.
Iani bidingo kobor ra·timgipa manderang baksa agangrikengon, ia bilsini Assembly election-o name dakna man·ahani gimin VPP da·o namen ka·dongbatataniko man·engaha ine Sukrobar salo, VPP-ni ku·wattimgipa Batskhem Myrboh parakataha.
“Ia chango chinga skanggipa changna susaahaoba chingni susagipa dam 18 seat-rangoni dambrikode chena man·ahani gimin chinga namen kusi ong·a,” ine Myrboh aganaha.
VPP-ni chegipa seat dambri, chong·motan Mylliem, Mawphlang, Umsning aro Nongthymmai constituency-rangni bidingo da·o uamang name nipiltaienga ineba VPP-ni dilgipa parakataha.
“East Khasi Hills-o balenggipa VPP-ni balwa, gipin a·jarangonaba gipanggen ine chinga ka·dongsoenga. Chinga chingni mingsing minggamaniko bariatna man·chongmotgen aro gipin a·jarangoba chingni bipekrangko songna man·gen,” ine Myrboh aganaha.
Ia chang Assembly election-o uamang bang·bata constituency-rangon candidate-rangko susaatna man·jaha ine janapatengon, iandake ong·genchimoba VPP-na ia constituency-rango bang·a manderangan chakpaanirangko on·enga ine VPP-ni ku·wattimgipa parakataha.
Gipin constituency-rangoba uamang candidate-rangko susaatna man·genchimode VPP-ni vote man·ani batangkugenchim ineba Myrboh aganaha.
“Political dilgiparangoni bang·batan manderangko cha·bokna man·aia ine chanchikuenga indiba da·o manderang dingtanganiko ra·bana gita VPP-o ka·donge nichakskaengaha,” ine ua aganaha.
Dingtang dingtang constituency-rango bimingrangko segatna gita uamang bakan kamrangko a·bachenggnok ineba VPP-ni dilgipa parakataha.
Myrboh-ni parakatani gitade, uamang 2022 bilsini November jaosa Election Commission-oniko registration-ko man·ahani gimin election-na skang VPP-ko bilakatna man·jahachim.
“Ua somoio pilakan election-na tarisamsoe jakchaktokjaha. Da·o chinga KHADC aro JHADC election-na tarisamsoengon, skanggipade biming segataniko a·bachengatgnok,” ine Myrboh parakataha.
VPP-ko pilakni namgninan kam ka·gipa dol ong·atna nangnikengani gimin uamang Garo Hills-oba VPP-ko bikotna jotton ka·gen ineba VPP-ni ku·wattimgipa parakataha.
Election-o chu·sokgipa ong·ahani gimin da·al Sonibar salni bako VPP, manderangko mittelpilskana gita dingtangmancha tom·bimonganiko Shillong songjinmani Polo Ground-o ong·atengachim.