TURA: Sukrobar pringwalchibara, Rongjeng bazar, jekon jolni manderang Khasi bazar ineba mingachim, ia bazar-ko wa·al kamaha aro ia bazar-o donggipa dam 10-mangni gita dokkanrang, chu·gimik kamgopako man·aha ine kobor on·aha.
Kobor on·timgiparangni u·iatani gitade, Sukrobar pringwalni 2:00 bajimango, jolni manderang, Rongmil police outpost-ona phone ka·atenba, Rongjeng bazar-ko wa·al kamenga ine kobor on·ataha aro koborko man·soa bakan ua biapona wa·al kimitgipa garirangko watataha.
Wa·al kimitgipa garirang sokbaa bakan chirangko satna a·bachengaha aro Rongjeng bazar-ni gipin bakrangona wa·al gipangako champengna man·aha.
Indake ong·genchimoba ua somoio ia bazar-o donggipa dokkan dam 10-mangkode chu·gimik kamsoahachim ine kobor on·aha.
Wa·al kamchapako man·gipa dokkanrangoni mitamde mirong dokkan aro dingtang dingtang bosturangko palgipa dokkanrang ong·achim ine kobor on·timgiparang parakataha.
Ia dokkanrangko wa·al kamanio komibeoba gong lak 20-na baten noksan ong·atako man·aha ineba kobor on·timgiparang u·iataha.
Ia bazar-ko maikai wa·al kamaha da·o dipet darangba ma·sikujaenga indiba police-rang ning·tue sandianirangko dakna a·bachengataha.
