SHILLONG: Meghalaya a·doko niam gri koela bikotaniko champengata intalan uni constituency-o bang·a manderangan maming janggi tangani cholrang dongjae neng·nikanirangko chagrongna nangtokengaha ine Mongolbar salo, Sutnga-Saipung-ni NPP me·chik MLA Santa Mary Shylla parakatenba, niamo pangchake koela bikotaniko ta·raken a·bachengatchina sorkariko didiangaha.
Assembly-ni Budget Session-o MLA-rangni chanchirimanio skanggipa changna bakko ra·angengon, a·doko niam gri koela bikotaniko champengata intalan uni constituency-o bang·a manderangan janggi tangani cholrang dongjae, kangal cha·a sitokna nangengaha ine Shylla parakataha.
NPP me·chik MLA-ni parakatani gitade, East Jaintia Hills a·jao bang·bata manderangan koelao pangchake janggi tanggiparang ong·achim.
Niam gri koela bikotaniko champengata intalan manderango bree cha·ani bilrang komiangahani gimin uni constituency-o bading chiwalani aro gipin kamrangba nangchakeaniko man·aha ineba ua aganaha.
Indake ong·genchimoba, a·doko niam gita koela bikotani kamrangko a·bachengna a·dok sorkari, ja·kurangko de·chakataha ineba Shylla, kusi ong·aniko parakataha.
A·doko niam gita koela bikotaniko a·bachengna man·na gita kamrangko ta·rakatchinaba ua a·dok sorkariko didiangaha.
Indake ong·engon, National Highway-6 gita gari gorarangni re·ruraanirang batrorobaengahani gimin Mawryngkneng-oni Malidor-ona dakanggipa ramako apalbatatchina gitaba Sutnga-Saipung MLA, a·dok sorkariko didiataha.
East Jaintia Hills a·jao Lumshnong C&RD Block-ko songe on·ahani gimin aro Sonapur-Borkhat ramako tarina gita gong kror 122-ko chamatahani gimin ua a·dokni Chief Minister Conrad Sangma aro Deputy Chief Minister Prestone Tynsong-koba mittelpilangaha.
