Resubelpara: Mingsa “Accelerating Change” ine pangchakaniko donenba North Garo Hills-ni Bakra Multi Facility Hall, Resubelpara-o World Water Day-ko mijalo maniangaha. Chini gamchatani, dingtangmancha ringna namgipa chirangni gimin ma·siate on·na aro uko ripingna cholrangko dakani gimin manderangna u·iataniko on·na gita ia programko PHE (DWSM, JJM) NGH-ni gita ong·atangaha.
Program-ona mongsonggipa sokgipa ong·e jinmana aganprakengon, a·gilsak gimiko china dilani gimin agane on·nan baksa songnokrang ta·rake jrlbra-jelsuani aroba buring bolgrimrangko bon·atani a·sel china dilaniko champengna man·jaenga ine North Garo Hills-ni Assistant Commissioner Tadingchi N Sangma aganaha. “Chi aro buring-bolgrimara nangchapgipa ong·ani gimin buring-bolgrim dongjaode chi dongja aro chi gride buringba dongskaja,” ua agandapaha.
Chiring chibisik aro rongtalgipa chirangko man·gipa biaprangoniko buring-bolgrimrangko nisigaljachina aro mikka bitchirangko simsake jakkalan baksa buring bolgrimrangko ripingchina gitaba ua, manderangko didiaha.
Jal Jeevan Mission scheme gita dakgipa Sorkarini mitam scheme-rangni bidingo janape aganengon, sorkarini on·gipa scheme-rangko an·tangtangnin gita simsake jakkalna nanga ine Sangma aganaha. Sorkarini jotton ka·a mangmangde chu·ongja; scheme-ni chu·sokgninade manderangni gisiko nange bakrimaniko nangchongmota ine Sangma aganaha.
Program ong·atani somoio, JJM-ko chu·sokatna kam ka·anio baditana chu·sokahachim uko Silgrak Sangma, DPM, DPMU, JJM,jinmana talataha, district-o ge 40684 nokdangrang donga uanoni ge 18012 nokdangrang JJM-ni namgniko man·engaha. Indake ong·engon, JJM-ko nokantiona sokatna gita kingkot kamrangko ka·enga ineba Sangma aganaha.
Unaskang, Chini gamchatani aro uko ripingani gimin manderangni gisepo mikrakataniko on·na gita pringchibarao A’we Pedallers, dolsa rengrengsil salsusagiparang Bakra MFC-oni Jolding Wari, damsa tourist spot-ona salsusaangaha. Cycle rally-ko Tadingchi Sangma, Assistant Commissioner, Dr N R Marak, Senior DM&HO aro sorkarini gipin official-rangni dongpaanio oprake on·angaha.
Unbaksana programni bak gita essay sesusaanio, noksa salsusaanio aro folk song song competition-o chegiparangko mandera·aniko dakangaha.
