SHILLONG: Medical Recruitment Board-ni gita a·doko sak 83 gital specialist doctor-rangko ra·ahaoba da·o sak 150 specialist doctor-rang chu·ongjaengani a·sel neng·nikanirangko chagrongna nangkuenga ine Sombar salo, a·dokni Health & Family Welfare Minister Ampareen Lyngdoh, Assembly-o parakataha.
Lyngdoh-ni parakatani gitade, Medical Recruitment Board-ni gita gital kam ka·giparangko rakkianio gimik sak 397 gital medical officer-rangko kamo ra·aha aro ianoni sak 83-de specialist doctor-rang ong·achim.
Assembly-o MLA-rangni sing·anirangna aganchakaniko on·angengon, a·doko sak 375 specialist doctor-rangna sanction post-rang donga aro ianoni sak 227 specialist doctor-rangsan kamrangko ka·engani gimin sak 150-de chu·ongkujaenga ine Health Minister parakataha.
Sak 83 gital specialist doctor-rangko kamo ra·ahaoba sak 150 specialist doctor-rangko nangkuengani gimin ian sorkarina jajrengna nangani ong·enga ine janapatengon, nangdapenggipa specialist doctor-rangko sandina gita sorkari ja·kurangko de·enga ine Lyngdoh aganaha.
Ri Bhoi a·jao medical college-ko kulina gita sorkari cholrangko niengkua ineba a·dokni Health & Family Welfare Minister, Nongpoh-ni UDP MLA Mayralborn Syiem-ni sing·anina aganchakaniko on·angaha.
Lyngdoh-ni parakatani gitade, tangka paisarangko chamdape on·anichi a·doko PHC, sub centre aro uandakgipa sanchakram nokrangko sorkari rikdapna miksongenga.
