SHILLONG: Meghalaya a·doko ‘high level tribe’ ba chugipa gadangni jat ong·katanian NPP-ni dilanichi skanggipa MDA 1.0 sorkarini mongsonggipa chu·sokani ong·aha ine Sombar salo, Umsning-ni Congress MLA Celestine Lyngdoh parakataha.
“Meghalaya a·doko mongsonggipa jatgittam, chong·motan Khasi, Jaintia aro Garo jatrang songdong a·chaa indiba da·ode an·chingo chugipa gadangni jatsa ong·kataha. MDA 1.0 sorkarini somoio ia gital jatko dal·rorona on·aha,” ine Assembly-ni budget session-o Lyngdoh aganaha.
Lyngdoh-ni parakatani gitade, ia ‘high level tribe’-ni a·selan a·dokni police-rangba, Meghalaya High Court mikkango kratchana gita nangaha.
“Ia ‘gital jat’-ni kamrangko nirikkina gita CISF-ko a·dokona rimbachina High Court ge·etaha. A·dokni police-rang kamtangko name ka·na man·jahani giminsa CISF-ko rimbachina High Court ge·etaha,” ine Umsning-ni Congress MLA parakataha.
Meghalaya a·dokko a·song gimiko tangka jakkalsretbatstanggipa a·dok ine a·songko dilgiparangni matnange aganangani giminba ua a·dok sorkariko sing·doangaha.
“Ia matnanganiko an·ching ramram manderang dakjaha indiba hajal hajal manderangni mikkang a·songni saksa dal·batsranggipa mandesa dakaha. Ian an·chingna namen ong·sianiko ra·baani gita ong·aha indide maikai an·ching iako nikgija dake dongna man·gen?” ine Lyngdoh sing·doangaha.
