SHILLONG: Meghalaya a·doko songdongenggipa pilaknin namgninasa reservation policy-ni roster system-ko ra·gatchina Meghalaya High Court rai on·aha ine A·chik Holistic Awakening Movement (AHAM) parakatenba, High Court-ni rai on·aniko mande ra·china Khasi aro Jaintia Hills a·jani dilgiparangko aro dingtang dingtang dolrangko didiataha.
Re·anggipa bilsini April 5 tariko High Court-ni on·gimin ge·etani bidingo janapatengon, Meghalaya a·doko roster system-ko ra·gatkujaskalde maming kamrangkon kam ka·giparangko rakkikujachina gita High Court ge·etaniko on·manaha ine AHAM-ni president Georgeprince Momin parakataha.
Reservation policy-o pangchakesa roster system-ko tariaha aro reservation policy-ni dongimin niamko ja·rikgijade kamrango ra·jachina gitaba High Court ge·etaniko on·manaha ineba AHAM-ni president parakataha.
Momin-ni parakatani gitade, Roster system dongjani a·selsa Meghalaya a·doko reservation policy-ko name ja·rikjaenga ine nikenba High Court, roster system-ko ra·gatchina rai on·aha.
Meghalaya a·doko reservation policy-ko kakket aro bebeo ja·rikjaengani a·selan kamrangko man·na nanggipa manderang man·tokjaenga ineba Momin parakataha.
Meghalaya a·doko reservation policy-ni roster system-ko ra·gatgija donchengkuchina gita Assembly-ni budget session-o Voice of the People’s Party (VPP)-ni MLA Ardent Miller Basaiawmoit-ni sorkariko didiangani ja·man, dingtang dingtang dolrangni gisepo jera ra·grikanirangko nikna man·engahachim.
