SHILLONG: National People’s Party (NPP)-chi dilenggipa Meghalaya Democratic Alliance (MDA) 2.0 sorkario bakrimenggipa dolrangni gisepo apsan miksongani gnang kamrangko ka·rimna man·na gita Common Minimum Programme (CMP)-ko tarichina gita United Democratic Party (UDP) ku·pattianiko on·angaha.
Ia Common Minimum Program-ara bakrime rikenggipa sorkarina apsan miksonganirangko segimin lekka ong·achim aro ian bakrime rikenggipa sorkarini gisepo meli nangrima gnang kamrangko ka·na tarigimin road map-ba ong·achim.
Batanggimin chang sorkariko rikaniode MDA-o CMP dongjachim aro iani a·selan bakrimenggipa dolrangni gisepo ku·cholsan ong·aniba dongjachim ine nikna man·a.
Indake ong·engon, MDA 2.0 sorkarini gisepo kattarangchi aro kamrangchiba apsan miksongani gnang kamko ka·na aro batanggimin somoirango gita ong·gija nambate sorkariko chalaina man·na gita CMP-ko tarichina UDP didiangaha.
“An·ching a·dokko chalaiengon, saksa sakgipinko mande ra·grike aro apsan miksonganirangko ra·bae kamrangko ka·na man·ode nambata,” ine UDP-ni general secretary Jemino Mawthoh parakataha.
Skangonin CMP-ko ra·gatani gimin UDP aganengachim ine janapatengon, a·dokni namroro silroroani, niam retirangko rakkiani ba je kamko ka·genchimoba a·dokni namgnina aro a·doko songdongenggipa manderangni namgninasa chanchichengna nanggen ine Mawthoh parakataha.
MDA-o bakrimenggipa dolrangni gisepo mande ra·grikani aro ma·sichakgrikani baksa Common Minimum Program-ko ra·gatna man·genchimode uan sorkario mai kamrangko man·enga ba maidakgipa portfolio-rangko man·enga, uko chanchiana bate nambatgen ineba UDP-ni general secretary parakataha.
CMP-ko tarianichi dingtang dingtang neng·nikanirang, jekai lekka porani, bijoliko man·ani, china neng·nikani, kamrangko tikate on·ani, an·seng baljokani aro uandakgipa dingtang dingtang neng·nikanirangko apsan nangrime namatna gita kamrangko ka·na man·gen ineba Mawthoh aganaha.
