TURA: Budbar salo North East Slow & Agrobiodiversity Society (NESFAS), Garo Hills-ni dingtang dingtang dolrang baksa nangrime Aman A·song Millet Festival-ko Tura-ni Hotel Polo Orchid-o ong·atangaha aro ia program-ko ong·atanio Dadenggre-ni Civil Sub Divisional Officer (SDO) Abhishek Gowda, mongsonggipa sokgipa ong·e bakko ra·angaha.
Ia program-ko ong·atanio College of Community Science, Meghalaya Basin Development Agency, Mission Organic Value Chain Development for Northeast Region aro ATMA-ni official-rang baksana NESFAS baksa bakrimenggipa dingtang dingtang songni game ge·e cha·giparang, Nokmarang aro gipinrangba dongpae bak ra·angtokaha.
Salgro salaram a·dokrango chengoni game ge·e man·baenggipa mi misirang da·o gimaroroangengahani gimin Tribal-rangni game ge·e cha·gipa mi misirangko tangatpiltaina gita NESFAS, batanggimin bilsirangonin iandakgipa program-rangko ong·ate manderangko didina jotton ka·enga aro ia 2023 bilsiko United Nations, International Year of Millet ine parakmanahani gimin ia Aman A·song Millet Festival-ko Tura-o ong·ataha ine NESFAS-ni official-rang parakataha.
Ia program-ko ong·atanio Dadenggre-ni Civil SDO Abhishek Gowda, tom·anio bak ra·giparangna aganprakangengon, misirangara mandeni be·enna namgipa cha·ani ong·ani gimin misini dingtang dingtang rokomrangko ge·na gita nangenga ine aganangenba, salgro salaram a·dokrango misirangko tangatpilna gita rakbee kamrangko ka·engani gimin NESFAS-ko aro game ge·e cha·giparangko mittelpilangaha.
Ia program-ko ong·atanio NESFAS-ni Garo Hills-na Senior Associate ong·enggipa Rimchi N Marak-ba jinmana aganprakengon, indita bilsirangna misi ge·aniko gimaatahani gimin misi ge·aniko tangchaatpilna nangenga ine aganangaha aro batanggimin bilsirango NESFAS-ni chu·sokatgipa kamrangni giminba jinmana agan-talate on·angaha.
Ia Aman A·song Millet Festival-ko ong·atani bak gita dingtang dingtang stall-rangko done misirang baksana ma·manti cha·ani bosturang, bitchilrang, sika-koa, wata chenganirang aro uandakgipa ma·manti bosturangko mesokangaha.
