RESUBELPARA: Re·anggipa Budbar attamo, Mendipathar police station-ni ning·o donggipa Nishangram song sambao, me·a bi·sa saksa an·tangni ripengskarang baksa cycle sale roengmiting somoio a·sel ong·e janggitangko gimaatna nangaha.
Koborko on·ani gitade, ia bi·sarang brake donggijagipa cycle-ko chugipa biaponi rongronge roengachim indiba ua somoio bilsi 12 ong·gipa me·a bi·sa, cycle-ni ta·rakaniko amchakjae ka·mao tarie dongipa foundation stone-o su·gakeaha aro ua a·sel ong·gipa biapon sikamaha.
Ia me·a bi·sani a·sel ong·ani ja·man unbaksa roenggipa bi·sa sakbonga, ua biaponi kene kataha aro iani a·selan ia me·a bi·sara sawachim aro banonichim, uko police-rang ma·sina man·kujaenga ine u·iataha.
Ia bi·sani nokdangko sandina gita North Garo Hills a·jani police-rang jotton ka·enga indiba da·o dipet darangba ia me·a bi·sani manggisiko ra·na re·bakujaengani gimin chu·sokna man·kujaenga ine koborko on·aha.
Ia biapara Assam baksa nangchapgipa simao ong·ani gimin ia bi·sani nokdangko sandianio police-rang neng·nikanirangko man·batenga ineba kobor on·aha.
“Chinga ia bi·sani gimin Dudhnoi, Goalpara, Damra aro Assam-ni gipin police station-rangonaba u·iataha indiba da·o dipet darangba report-ko on·pila dongkujaenga. Chinga ia bi·sani manggisiko uni nokdangna on·atna nangnikengani gimin dakchakanirangko nangengachim,” ine North Garo Hills a·jani SP Shailendra Bamaniya parakataha.
Ia bi·sani siani a·selko ma·sina gita post mortem-ko ka·aha aro ia bi·sako ma·sina gita police-rang dingtangmancha dakchakanirangko on·china gitaba manderangko mol·molataha ine ua parakataha.