TURA: Bangladesh a·songona niam gri palsrukatenggipa supari ba gue granrangko Sonibar salo, 43 Battalion BSF-ni sipairang rim·na man·aha.
Koborko on·ani gitade, India a·songoniko niam gri Bangladesh a·songona ra·angenga ine koborko man·soani ja·man 43 Bn BSF-ni sipairang, South Garo Hills a·jani Rongara police station-ni ning·o donggipa Dambuk A·pal jolrango nirok sandianirangko dakna a·bachengaha. Ua somoio BSF sipairang, supari salangenggipa gari bolgniko rim·na man·aha indiba gariko saltimgiparang, BSF sipairangko nikon, ua biaponi kate jokna man·aha.
BSF official-rangni u·iatani gitade, ia suparirangara Kg 5000-na batachim aro ia suparirangni damara komibeoba gong lak 11-mang ong·achim.
Ja·mano ia suparirangko BSF official-rang, Rongara police station-na pakwate on·ataha.
