TURA: Re·anggipa antirangonin West Garo Hills a·jao nangana batpile ding·engani gimin skulo poraienggipa bi·sarang, skigiparang aro kamko ka·enggipa manderangni namgnina, West Garo Hills a·jani ning·o donggipa Primary, Middle, Secondary aro Higher Secondary skulrang gimikkon April 19 tarikoni April 21 tarikona, pring 8:00 bajioni attam 3:00 bajiona chipe donchina gita West Garo Hills a·jani Deputy Commissioner Jagdish Chelani ge·etaniko on·ataha.
Attamo ba walo ka·enggipa skulrangkode pangna ka·ronga gitan ka·angkuna man·aigen ineba ua u·iataha.
“Ia sal somoirango ding·anirang batroroengani gimin skulo poraienggipa bi·sarangnasan ong·aigija skigiparangna aro gipin kamko ka·enggipa manderangnaba kenchakna nanganirang ong·enga. Uni gimin ia ge·etgiminko ja·rikchina gita pilak skulrangkon aro District School Education Officer-koba u·iatenga,” ine Chelani parakataha.
Indake ong·engon, National Deworming Day-na mop up exercise-ko re·baenggipa April-ni 24 tarik Sombar salo pilak skulrangon dakangskagen ineba West Garo Hills a·jani Deputy Commissioner parakataha.
Garo Hills-o mikkarang waani komiengahani a·sel aro buring bolgrimrang porongrong ong·roroangengahani a·selan ia sal somoirango ding·anirang bilongbatroroengahachim ine nikna man·a.
Mikkarang wasrangjaengahani a·selan Garo Hills-o mingsinggipa Simsang chibimako man·chape pilak chiring chibisikrangan da·o chonroroengako nikna man·engahachim.
